Bag-ong school bldg sa paknaan hayan matukod sa 2025

CEBU, Philippines —  Ang upat ka andana nga school building sa barangay Paknaan mao ang unahon sa pagtukod sa dili pa kasugdan ang construction sa dose ka andana nga school building.

Kini suma pa ni Architect Felix Villanueva Jr., Area Manager for Region 7 sa Department of Education atol sa gihimong inspection kagahapon uban ni Mandaue City Lone District Representative Emmarie “Lolypop” Ouano-Dizon.

Suma pa ni Villanueva nga nahinabi sa mga tigbalita nga ang proposed 12-storey building sa Paknaan National High School, sugdan sa pagtrabaho sa tuig 2025.

Nasayran ang katukoran sa duha ka buildings matigayon gumikan sa paningkamot sa kongresista.

Nagkanayon si Villanueva nga gikinahanglan nga unahon ang pagtukod sa upat ka andana nga building tungod sa nagkataas nga gidaghanon sa mga tinun-an.

Gipasabot ni Ouano-Dizon nga ang 12-storey school building matukod sa tuig 2025 nga dunay budget nga P660 million ug aduna nay luna nga mokabat sa 2,000 square meter nga gidonar sa ilang higala nga negosyante nga Oscar Chua.

“Based sa ocular inspection ni DepEd  Undersecretary Epimaco Densing III last week, nakita nga there is a need nga magtukod og school building aside sa 12-storey building. So mao to nga there is a need of additional 1,000 square meter lot for the construction of the 4-storey building.

Unya kani nga additional lot is already approved by Oscar Chua in principle,” segun pa ni Dizon.

Malaumon si Dizon nga kasugdan ang construction sa four-storey building sa dili pa matapos karong tuiga.

Sa kinatibuk-an adunay mokabat sa 60 ka classroom sa dose ka andana nga school building nga dunay dugang 18 ka classrooms alang sa laboratories ug ubang pasilidad.

Sa pagkakaron ang Paknaan Elementary School dunay 10 ka buildings nga dunay 43 ka classrooms. Samtang ang Paknaan National High School adunay 3 ka buildings, 16 ka instructional classrooms, ug laboratories.

Ang total student population sa niaging school year sa Paknaan National High School mikabat sa 2,426 samtang ang Paknaan Elementary School, adunay 3,751 pupils.

“Atong makita nga naghuot na gyud ang mga estudyante sa kani nga eskwelahan. It’s about time na gyud for expansion,” dugang pa ni Dizon. (CEBU NEWS)