Tunnel sa SRP gikatakdang isirado

CEBU, Philippines — Ang pangulo sa City of Talisay Traffic Operations and Development Authority Jonathan Tumulak nipadayag na sa ilang plano alang sa pagmenos sa grabeng trapik nga masinati panahon sa pagsira sa Cebu South Coastal Road.

Ang maong pagpangandam nila ni Tumulak naglakip diha sa Laray junction nga maoy access road sa Cebu City ngadto sa Laray, ikaduha mao ang hugot nga pag-monitor sa dalan sa N. Bacalso sa dili pa magsugod ang klase.

Matud ni Tumulak nga ang maong mga dalan gipanglantawan nga makasinati og taas nga volume sa traffic sa nagsingabot nga pagsira sa tunnel diha sa South Road Properties karong Hulyo 18, 2024.

Si Tumulak naglaom nga aduna sila’y koordinasyon uban sa mga balay patigayon sama sa tunghaan nga molugway sa ilang enrollment season aron makamenos sa volume sa mga sakyanan nga mopadulong sa mga eskwelahan aron magpa-enroll. Ang mga balay patigayon mo deploy sa ilang mga delivery truck nga adunay mga deliveries sa produkto nga dili dali nga madaot sa kadlawon o gabii aron dili makadugang sa volume sa traffic sa adlawan.

Ang Road Management Authority nibutyag nga karong Hulyo 18, 2024 ang mga motorsiklo ug three wheeled vehicles dili tugotan nga makasulod ug makaagi diha sa Cebu South Coastal Road.

Nasayran nga ang partial road closure kabahin sa underground tunnel alang sa repair ug rehabilitasyon human nakita sa Road Maintenance Section sa Department of Public Works and Highways ang pagpangliki ug nangaguba ang suga atol sa ilang ocular inspection nga gipahigayon. (BANAT NEWS)