4-anyos naugbok, natagak sa sapa patay

CEBU, Philippines — Nakabsan og kinabuhi ang 4-anyos nga bata human kini natagak ug nalumos sa sapa pasado ala-1 niadtong Domingo sa hapon, Hunyo 30,2024  diha sa Sitio Tal-ot, Barangay Inayawan ning Dakbayan sa Sugbo.

Ang inahan sa bata nga si Marjorie Maravillo, 19, miduol sa Inayawan Police Station ug mipahibalo sa nahitabo sa iyang anak.

Asoy ni Maravillo nga naa siya sulod sa balay nagpatotoy sa iyahang usa pa ka tuig nga anak sa dihang nakadungog siya’g siyagit gikan sa gawas.

Nakita na lang niya ang anak nga wala nay panimuot ug gabuwa na ang baba niini ug gitabang sa iyahang mga silingan.

Nasuta nga sa wala pa kini nahitabo, giingong gaduwa ang 4 anyos niyang anak kauban ang silingang bata sa sementadong paril nga utlanan sa sapa.

Matud pa naglingkod-lingkod pa kini sa taytayan nga adunay gitas-on nga gi bana-bana ngadto sa 10 hangtud 12 ka tiil.

Atol sa imbestigasyon sa kapulisan sa Inayawan Police Station 7, posibleng natagak kining bata gikan sa taytayan ug naugbok sa sapa.

Nasayran usab nga adunay samad sa agtang ug sa luyo’ng bahin sa ulo ang bata agi sa pagkaugbok ug maoy hinungdan nga nawagtangan kini’g panimuot ug natagak ngadto sa sapa.

Gidala pa kini sa Cebu City Medical Center (CCMC) apan gi deklarar na kining patay pag-abot sa tambalanan.

Padayon ang imbestigasyon sa kapulisan sa maong hitabo. -- Irish L. Laborte (BANAT NEWS)