Binata, natagpuang patay sa ilalim ng tulay
Makikipagkita lang sa buyer ng laptop
BASUD, Camarines Norte, Philippines — Bangkay na nang matagpuan sa ilalim ng tulay ang isang binata na naiulat na nawawala ng halos apat na araw sa Bicol National Park ng Brgy.Tuaca sa bayan ng Basud, Camarines Norte kamakalawa ng umaga.
Kahit halos hindi na mamukhaan dahil sa naaagnas na pero kinilala ng mga kaanak base sa suot na pantalon, t-shirt, paha (leather belt), at bracelet ang bangkay ng biktima na si Jayson Clidoro, 38-anyos, residente ng Naga City, Camarines Sur.
Naiulat ng pamilya na nawawala si Jayson, alas-3 ng hapon noong Hunyo 27 na makikipagkita lang sa buyer niya umano ng laptop sa bayan ng Sipocot.
Ayon sa ulat, dakong alas-9:30 ng umaga nang aksidenteng matagpuan ng isang DENR forest ranger na kinilalang si Jai-ar Adlawan ang bangkay ng biktima sa damuhang bahagi sa ilalim ng tulay ng naturang lugar.
Agad ipinagbigay-alam ng forest ranger sa mga pulis ang nakitang bangkay na mabilis namang rumesponde sa lugar.
Hindi pa malaman kung ano ang ikinasawi ng biktima, kung paano napunta sa bayan ng Basud sa Camarines Norte at kung doon na mismo siya pinatay.
Isinailalim na sa autopsy ang labi ng biktima habang patuloy ang ginagawang imbestigasyon para matukoy ang pagkakakilanlan ng salarin.
- Latest
