Mga negosyante sa Russia gidapit alang sa economic forum sa sugbo

CEBU, Philippines — Nagplano si gobernador Gwendolyn Garcia nga mopahigayon og internasyonal nga panagtapok sa mga magpapatigayon, tourism stakeholders ug medical experts sa Sugbo atol sa selebrasyon sa ika-455 nga kasumaran sa lalawigan sa Sugbo.

Gidapit ni Garcia ang nagkadaiyang grupo atol sa iyang pagbyahe sa nasud sa Russia partikular na sa Moscow ug St. Petersburg diin tua karon ang gobernadora alang sa siyam (9) ka adlaw nga business trip nonot sa pag-renew sa sisterhood agreement sa St. Petersburg ug pagtambong sa St. Petersburg International Economic Forum (SPIEF 2024).

Atol sa SPIEF, si Garcia nakigdayalogo sa mga businees leader sa Russia ug ASEAN nga dunay posibilidad nga mo-invest sa Sugbo.

Apil sa gidapit ni Garcia nga motambong sa plano niining panagtapok mao ang mga lokal nga opisyal sa Saint Petersburg ug sa mga business leaders niini apil na sa Moscow; mga opisyal sa Russian air transport agency, independent travel agencies ug uban pa nga stakeholders.

Matud ni Garcia nga importante ang pagtambong sa mga travel agencies ug mga opisyal sa turismo ug mga opisyal sa Federal Agency for Air Transport Agency o FAATA aron mahisgotan ang planong pagbutang og direkta nga flight o byahe sa eroplano gikan ug padulong sa Russia ug Sugbo pinaagi sa Filipino airline o di ba kaha sa Russian Airline.

Sumala sa Sugbo News, ang news portal sa Probinsiya sa Sugbo nga kinahanglan og 92% nga market aron mahimong "viable" ang commercial flights padulong ug gikan sa Russia ug Sugbo.

Pag-abot sa medikal nga sektor, si Garcia nakigtagbo sa mga doktor sa Napalkov Cancer Center sa Saint Petersburg diin iya usab giimbitar ang maong mga medical professional sa maong forum aron makita niini ang tinuod nga sitwasyon sa medical practice ug serbisyong medikal sa Pilipinas particular na sa Probinsiya sa Sugbo. Lakip sa gidapit ni Garcia ang mga leader sa Russian-ASEAN Business, Moscow Chamber of Commerce ug Saint Petersburg Chamber of Commerce.

Ang Russian-ASEAN Business Council chairman nga si Ivan Polyakov nipadayag og interes sa pag-invest sa Pilipinas sama sa pakig-alayon sa mga financial institution kon diin makaduol ang mga Russian businessmen ug turista kon sila mobyahe gawas sa ilang nasud. (BANAT NEWS)