Swimming pool sa sports center giablihan alang sa mga atleta

CEBU, Philippines — Human sa hapit usa ka tuig nga pagsira niini alang sa renovation, ang Cebu City Sports Center (CCSC) miabli pag-usab sa ilang pool facility ug gipakita ang bag-ong gi-ayo nga mga feature kagahapon (Huwebes), Mayo 2, 2024.

Gibuksan pinaagj sa usa ka ceremonial re-opening ang pool facility sa CCSC ngadto sa mga atleta nga gipangulohan ni Cebu City Mayor Michael Rama ug ubang mga opisyal ilabi na si Konsehal Donaldo Hontiveros, Chairman sa Committee on Sports sa Cebu City Council.

Sa usa ka pakighinabi, si John Pages, Chairman sa Cebu City Sports Commission niingon nga kini nga renovation nagkantidad og labing menos P25 milyones, pundo nga na natigum pinaagi sa mga private donors.

Gitug-an ni Pages nga ang primary pool adunay bag-ong filtration system ug starting blocks nga ikatandi sa "international standards".

Lakip sa mga feature nga gipasigarbo ni Pages mao ang pag-convert sa kiddie pool ngadto sa 25-meter warm up pool, usa ka requirement nga kinahanglanon sa pag-host og National Sports Events.

Tungod niini, si Pages nagkanayon nga andam na ang pasilidad alang sa pag-host sa Central Visayas Regional Athletic Association (CVIRAA) nga gikatakdang mahitabo karong Mayo 4 hangtod 9, 2024.

Bisan kung ablihan ang pool alang sa mga atleta aron sila magpraktis alang sa CVIRAA meet, si Pages miingon nga pagkahuman sa regional meet, ablihan dayon kini sa publiko.

Lakip sa mga feature mao ang bag-ong gi-renovate nga shower room, comfort rooms, kisame, ug hallways.

Si Bryle Villahermosa, 15-anyos nga swimmer, lakip sa mga morepresentar sa Cebu City alang sa CVIRAA, nipadayag sa iyang kalipay sa pag-abli og balik sa pool.

Matud niya, mahimo nang magpraktis sa saktong avenue ang mga swimmers sama niya. (BANAT NEWS)