CCPO mo imbentaryo sa ilang mga personnel nga adunay mga patik

CEBU, Philippines — Andam motuman ang Cebu City Police Office sa memorandum nga gipagawas sa ilang kadagkoan sa Philippine National Police (PNP) kalabot sa mga patik sa mga police personnel nga makita ug dili makita kon magsul-ob na sa ilang mga uniporme.

Sayo pa, ubos sa memorandum sa PNP nga kadtong mga polis nga makita ang patik inig sul-ob nila og uniporme kinahanglan nga ipatangtang kini samtang kadtong matabonan dili na kinahanglan apan mohimo sila og affidavit kabahin sa kahulogan ug hinungdan ilang patik ug mosaad nga dili na nila kini pun-an.

Samtang sa mga mosulod sa organisasyon kinahanglang wala kini patik ug ipatangtang kong aduna.

Nunot niini, si Police Lieutenant Colonel Janette Rafter, deputy city director for operations sa Cebu City Police Office nagkanayon nga mag-inventory sila sa ilang mga polis nga adunay mga patik nga makita ug dili makita inig sul-ob nila sa uniporme.

 Kong unsa mang ani iyang kamandoan sa taas (Chief PNP General Rommel Marbil) mao pod na among sundon diri sa ubos..Again we have to comply with what is directed gikan sa taas , matud ni Rafter.

Subay niini, human nipagawas ang Camp Crame og kamandoan sa pagsusi sa kapolisan nga anaa sa serbisyo kinsa adunay mga patik, ang bag-ong hepe sa kapolisan sa Dakbayan sa Talisay Police Lieutenant Colonel Epraem Paguyod nagkanayon nga mosunod sila sa maong kamandoan.

Matud pa ni Paguyod nga mohimo siya og inventory ngadto sa iyang mga sakop nga adunay mga patik sa lawas.

Dugang ni paguyod nga tungod kay bag-o pa siya nilingkod isip hepe sa kapolisan sa Dakbayan sa Talisay ang maong memorandum circular iyaha kining basahon pagbalik.  (BANAT NEWS)