Seguridad sa mga delegado ug atleta sa CVRAA gipaniguro

CEBU, Philippines — Nakahan-ay na ang seguridad nga ipatuman sa Cebu City Police Office (CCPO) alang sa pagsugod sa Central Visayas Regional Athletic Association (CVIRAA) karong adlawa, Mayo 4, 2024.

Apan giklaro ni Police Lieutenant Colonel Janette Rafter, Deputy City Director for Administration sa Cebu City Police Office nga samtang gihimo ang CVIRAA posible dunay mga kausaban nga ipatuman ilabi na kun mas makapalambo kini sa malinawon ug hapsay nga pagpahigayon sa CVIRAA.

Nasayran nga moabot sa 500 ka mga police personnel ang gi-deploy apil na niini ang billeting security nga gikan sa nagkalain-laing delagado sanglit nagdala sila og kaugalingon nilang kapulisan nga komportable sila.

“Supposed to be, ang concept ato the augmented personnel from whichever CPO maoy mo duty but there was an instruction from DRDO Police Colonel Noel Flores nga in order nga ma maximize ang mga tawo sa isla ug Cebu Island so nagkuha nalang ta from attending unit,” sigon ni Lt. Col. Rafter.  Dunay 20 ka tunghaan sa siyudad ang gigamit isip billeting area ug kada billeting areas dunay unom ka mga police personnel nga gikan sa participating unit ang gabantay.

Nag-establisar sab ang CCPO og Multi-Agency Coordinating Center ang CCPO nga nahimutang sa 4th floor sa Cebu City Social Hall.

Tanang personnel nga gi-deploy sa kalihukan dunay kaugalingong handheld radio nga magamit alang sayon nga pag contact sa MAC.

Sa pikas bahin, gisuportahan sa mga nagkadaiyang LGUs ang ilang mga atleta nga gipadala sa CVRAA meet apil niini ang paghatag kanila og uniporme, sapatos, pagkaon, allowance, ug support staff aron dili mabalda ang ilang pagduwa.

Ang Talisay City, mipadala og 800 ka delegado para sa maong kompetisyon sumala pa ni Dr. Arden Monisit, schools division superintendent sa maong siyudad.

Bisan og duol ra ang Talisay City sa Cebu City, gibutang gihapon sila sa Labangon Elementary School aron masigurong dili ma late ang mga atleta sa ilang mga duwa.

Si DepEd-7 Director Salustiano Jimenez miingon nga moabot sa 12 mil ka mga partisipante gikan sa 20 ka mga schools division  sa rehiyon ang mosalmot sa CVIRAA karong tuiga.— Rowena Capistrano, Romeo Limpangog ug Gabriel Bonjoc, IBM BANAT NEWS