Drayber sa mixer miunay og kawat sa iyang krudo
CEBU, Philippines — Dako ang pagmahay sa usa ka 34- anyos nga lalake human kini gidakop sa gwardiya sa gitrabahoan niining construction company kay nasakpan kini nga nangawat og krudo sa mixer truck nga iyahang gimaneho kagahapon sa alas 12 sa tungang gabie diha sa S. Osmeña Avenue, Barangay San Roque, siyudad sa Sugbo.
Ang nga 34 anyos, lumad nga taga Alanghilanan Manjuyod, Probinsya sa Negros Oriental naaktohan matod pa nga “nagpaihi” sa tangke sa mixer gamit ang hose.
Niabot sa 18 ka litros nga krudo ang nakuha sa suspetsado nga nagkantidad og P1,160 apan naaktuhan sa roving guard ug gi-turnover sa Waterfront Police Station 3.
Matod niya ang krudo nga iyang gikuha ihatag niya sa iyang uyoan nga mobiyahe paingon sa Negros Oriental kay nihangyo kini niya og krudo ug ilisan lang kung makabalik na sa Sugbo.
Duha ka tuig na nga nagtrabaho sa maong construction company ang suspek apan mao pa kadto ang unang higayon nga iyaha kining gibuhat.
Nangayo og pasaylo ang suspek sa construction company ug misaad nga dili na niya usbon tungod kay gagmay pa ang tulo ka mga anak niini.
"Nagmahay gyud ko. Hinaot nga maluoy sila nako, naa pa ‘tawon koy gagmay'ng bata, ako ray gisaligan tawon panarbaho," hangyo pa niini. IBM BANAT NEWS
- Latest
