Tulo ka tawo nadakpan, P8M shabu nasakmit
CEBU, Philippines — Nadakpan sa City Drug Enforcement Unit sa Cebu City Police Office (CCPO) ang duha ka mga drug personalities sa ilang buy-bust operation sa Sitio Plastikan, Barangay Duljo-Fatima, siyudad sa Sugbo niadtong Sabado sa hapon.
Nagtingkagol karon sa prisuhan ang mag-uyoan nga suspetsado nga sila si John Albert Homecillo alyas Pidoy, 26, usa ka High Value Individual ug Jesson Abuyo Homecillo, 41, pulos residente sa Sitio Riverside sa maong barangay.
Ang mga suspetsado nakuhaan og 1,030 grams nga shabu nga nagkantidad og kapin 7 million. Nasayran ang mga suspetsado mga bag-ong sulbong nga drug personalities.
Matod pa ang contact niini sa supply sa illegal nga drugas naa sulod sa prisohan ug makabaligya sila og tunga sa kilong shabu kada semana.
Samtang nasakmit sa hiniusang operasyon sa mga sakop sa City Drug Enforcement Unit (CDEU) ug kapolisan sa Presinto 4 sa Mandaue City Police Office (MCPO) 150 gramo nga shabu nga nagkantidad og kapin sa P1 milyon gikan sa High value Individual (HVI) sa miaging gabii sa Barangay Maguikay.
Ang dinakpan nga 43-anyos nga ginang nasakmitan og ginadili nga drugas nga mobalor usa ka milyon ka pesos ng shabu diha sa barangay Maguikay niadtong Sabado sa gabii.
Ang nasikop taga Sitio All Season, Barangay Cogon-Pardo Dakbayan sa Sugbo. Matud pa bodegera sa shabu ang suspek ug hatdan lang kini og drugas sa sinugo sa uyab niining toa sa New Bilibid Prisons sa Muntinlupa. – Romeo Limpangog, Rowena D. Capistrano (BANAT NEWS)
- Latest
