Sobra usa ka kilong shabu nasakmit

CEBU, Philippines — Nadakpan sa mga operatiba sa Bohol Police Provincial Office (BPPO) ang usa ka Regional Priority Target List nga High Value Individual sa ilang buy-bust operation sa Purok 7, Barangay Tiptip, Tagbilaran City, Probinsya sa Bohol, pasado alas 9 sa gabie, Biyernes, Abril 5.

Ang dinakpan mao si Michael Napisa, 42, wala'y trabaho ug residente sa Purok 7, Barangay Manga, Tagbilaran City.

Ang suspetsado nakuhaan og 1,030 grams sa gituohang shabu nga nagkantidad og kapin P7 million.

Sa impormasyon nga nakuha sa kapulisan nahibaw-ang dinakpan nabilanggo na kaniadto tungod sa kalapasan sa Republic Act 10591 ug nakagawas niadtong Agosto 2023.

Dihang nakagawas giingong nalambihit kini sa pagpamaligya og illegal nga drugas.

Nasayran sa imbestigasyon nga nagsilbing bodegero ang maong suspetsado ug maka dispose ang dinakpan og 200 grams ngadto sa duha ka kilo nga illegal nga drugas kada buwan ug dili lang sa Tagbilaran City ang area of operation niini apil na ang mga silingan nga mga lugar.

 “PRO7 will initiate more intelligence-driven operations in the fight against illegal drugs for a peaceful and safer Central Visayas in steadfast adherence to the BIDA program,” matud ni Police Regional Office (PRO) -7 Regional Director Brigadier General Anthony Aberin.

Samtang nasakmit sa kapolisan sa Presinto 5 sa Mandaue City Police Office (MCPO) ang 50  gramo nga shabu nga nagkantidad og P340 mil gikan sa High Value Individual  nga nadakpan sa buybust operation diha sa Sitio Tambis,  Barangay Umapad, Siyudad sa Mandaue alas-3 sa miaging Biyernes sa kaadlawon Marso 5, 2024.

Ang nadakpan giila nga mao si Jomarie Escabosa Carinea, 31, molupyo sa Sitio Mohon  sa Barangay Kasambagan sa Siyudad sa Sugbo. Si  Police  Major  Emmanuel  Cabanlit,  hepe  sa Presinto 5  sa MCPO kauban sa mga sakop sa Philippine Drug Enforcement Agency (PDEA) 7  ang nagpahigayon og buy bust operation batok sa maong dinakpan  sa maong lugar nga miresulta sa pagkasikop niini.

Si Cabanlit miingon nga nakakuha sila og impormasyon sa ilegal  nga kalihokan sa maong dinakpan nga naglihok  sa maong lugar gikan sa mga nag-una nga mga nadakpang mga pushers sa maong lugar nga nagtumbok kaniya nga maoy tigtagak og shabu ngadto kanila.

Ang mga dinakpan natingkagol  naa karon sulod sa detention cell  sa kapolisan ug gikatakdang pasakaan og kasong kalapasan sa Republic Act 9165 o Comprehensive Dangerous Drug Act of 2002.— Romeo  T.  Limpangog, IBM BANAT NEWS