P39 milyong drugs, 240 pushers nadakpan

CEBU, Philippines — Gipahibalo sa Police Regional Office-7 nga gikan Marso 24 hangtud Marso 31, ang kapolisan nakadakop og 240 ka drug personalities ug nakasakmit og balor P39.3 milyones nga ginadiling drugas sa maong mga adlaw.

Samtang 21 ka most wanted ug 169 ka ordinary wanted persons ang nadakpan sa dihang giimplementar sa kapulisan ang ilang mga pending warrants of arrest.

Niresulta sab sa pag recover sa 203 unregistered firearms, pito ka explosives, 162 ka ammunitions ug 39 ka indibidwal ang nasikop ang pagpatuman sa Oplan Katok ug operasyon batok loose firearms.

Si PRO-7 Regional Director Brigadier General Anthony Aberin miingon nga ang pagsumpo sa krimen kinahanglan og hiniusang aksyon sa tanan.

“The arrest of 1,296 suspects and the confiscation of the huge volume of illegal drugs are the results of the strong, strategic and consistent partnership with other law enforcement agencies and the community.  Our aim is crystal clear: Make Central Visayas a haven for peace and security," Aberin pa.

Sa kalambigit nga balita, nadakpan sa mga operatiba sa Station Drug Enforcement Unit sa Labangon Police Station 10 ang gitumbok nga High Value Individual atol sa ilang buy-bust operation sa E. Sabellano Street, Barangay Quiot, siyudad sa Sugbo, alas 12 sa tungang gabie kagahapon, Abril 2.

Ang suspetsado mao si Junros Juezan Fernandez alyas EJ, 23, residente sa Belgium Street, Barangay Suba, ning siyudad.

Ang suspetsado nakuhaan og 60 gramos sa gituohang shabu nga nagkantidad og P408,000.

Sigon ni Police Major Eraño Regidor, Hepe sa Labangon Police Station nga unang higayon nila nga nadakpan ang maong suspetsado apan pirme na nilang madungog ang pangalan niini.  Samtang sa Dakbayan sa Talisay,  dul-an sa usa ka milyon ka pesos nga kantidad sa shabu ang nasakmit sa managlahi nilang operasyon niadtong milabay nga gabii.

Sa operasyon sa Sitio Sawsawan, Barangay San Roque  nadakpan si Ronel Reyes Doverte, 40, ug ang iyang ig-agaw nga si Julie Reyes Fernandez, 51.

Wa na makapalag ang mga dinakpan nga nakuhaan og shabu nga mitimbang og 85 gramos nga gibana-bana nga balor nga P578 mil.

Mga alas 10:32 sa gabie nadakpan sab si Mc Chloed Helig Paculaba alyas Mak-Mak, 21, taga Sitio Tunga, Barangay Tanke sa nahisgutang siyudad.

Nakuhaan siya og shabu nga nitimbang og 30 gramos nga adunay gibana-bana nga balor nga P204 mil.

Ang mga dinakpan gipangbalhug sa bilangguan ug mag atubang sa kalapasan sa pagpamaligya og ilegal nga drugas. Gabriel Bonjoc ug Romeo Limpangog, IBM BANAT NEWS