Magsige’g pa-display og armas gidakop sa CIDG

CEBU, Philippines — Gidakop sa mga operatiba sa Criminal Investigation and Detection Group( CIDG) Mandaue City Field ang giingong gikahadlukan sa Dakbayan sa Lapu-Lapu nga usa ka 19 anyos nga lalake atol sa ilang buy-bust operation sa Langob, Barangay Poblacion, Dakbayan sa Lapu-Lapu, gabie sa adlaw’ng Huwebes, Marso 28.

Ang dinakpan mao si Cleave Villarosa Ardiente, 19, residente sa Sitio Kawayan, Barangay Gun-ob, Lapu-Lapu City. Nakuhaan ang dinakpan og usa ka kalibre .357 revolver ug P500 nga buy-bust money. 

Nakadawat og reklamo ang CIDG Mandaue City Field Unit batok sa suspetsado kay matod pa kanunay kining magpakita og armas sa ilang lugar maong nahadlok ug nabalaka ang mga silingan.

Sa gihimong pakisusi sa kapulisan sa “agi” sa gireklamo, nahibaw-an nga duna kini gidunggab matod pa sa dakbayan sa Lapu-Lapu apan wala lang mopasaka og kaso ang biktima tungod kay nahadlok.

Nasuta sab nga gitumbok kini  nga notadong kawatan ug mismo mga silingan maoy nihatag og impormasyon sa kapulisan sa mga ilegal nga binuhatan sa suspek hinungdan nga gilusad ang buy-bust operation nga bahin sa lang “Oplan Paglalansag” nga miresulta sa pagkasikop sa suspetsado.

Pasakaan og kasong kalapasan sa Republic Act 10591 ang ipasaka batok sa suspetsado.-(BANAT NEWS)