Managhigalang hubog napunggit sa multicab, usa patay

CEBU, Philippines — Patay ang usa ka construction worker samtang angol ang kauban niini human sila nadasmagan og multicab sa National Highway sa Sitio Labangon, Barangay Tulic, Lungsod sa Argao niadtong Dominggo, Marso 24, 2024.

Ang biktima giila nga Nelson Sardido Pantojan, 42, residente sa Kalagasan sa maong lungsod.  Gidala pa kini sa Isidro C. Kintanar Memorial Hospital sa Barangay Bogo apan gideklarar nga dead-on-arrival.

Samtang ang angol nga kauban niini mao si Marlon Lamban Legorio, 34 anyos, molopyo sa Lungod sa Malabuyoc gidala sa Cebu City Medical Center gumikan sa grabeng angol nga naangkon niini.

Base sa imbestigasyon sa Argao Police Station ang duha pulos hubog samtang naglakaw sa naasoy nga lugar.

Ang biktima aksidente matud pa nga nabanggaan sa multicab nga kusog og dagan ug gimaneho sa usa ka 60 anyos nga senior citizen. Ang duha nalabay sa karsada gumikan sa kakusog sa bangga. Ang driver mag-atubang og kasong reckless imprudence resulting in homicide and serious physical injury.

Samtang nalandig sab sa tambalanan ang usa ka 34-anyos nga lalaki human ang iyang gidrayban nga SUV nadasmag sa mixer truck diha sa Cebu South Coastal Road (CSCR) habig sa Barangay Tanke, Dakbayan sa Talisay kagahapon sa kaadlawon.

Ang drayber sa SUV mao si Neri John Arrogancia, 34, taga Barangay Guadalupe, Syudad sa Sugbo. Samtang ang drayber sa mixer truck mao si Argie Banson, 23, taga Negros Oriental.

Si Jonathan Tumulak, pangu sa City of Talisay-Traffic Operation Development Authority (CT-TODA) niingon nga kusog ang padagan sa SUV.

Apan pagabot sa lugar kalit nga migawas ang mixer truck gikan sa eskina hinungdan sa panagbangga. Nagusbat ang SUV hinungdan sa pagkabun-og sa drayber nga gidali og dala sa tambalanan.

Ang drayber sa mixer truck ang naa karon sa buhatan sa CT-TODA samtang nagpaabot nga mopasaka og kaso ang drayber sa SUV. (BANAT NEWS)