Brigada News FM miaksyon batok sa ilang duha ka anchormen

CEBU, Philippines — Adunay gihimo nga "internal action" ang management aa Brigada News FM human  sa kontrobersyal nga interview sa duha ka anchor niini nga sila Atty. Juril Patiño ug Dennis Tabar ngadto sa 4-anyos nga babaye nga giingong biktima sa abuso.

Kini human sa sunod sunod nga mga pagsaway nga nadawat sa duha ka brodkaster apil na pud sa maong radio station.

"As such, Brigada has taken immediate internal action to implement administrative sanctions. Both Atty. Juril and Dennis Tabar have expressed profound regret for any inadvertent harm caused and have publicly expressed their sincere remorse as well as willingness to accept responsibility for any errors that may have been made," pagbasa sa pamahayag sa Brigada News FM nga gipirmahan sa area manager sa Visayas nga si Raul del Prado.

Wala hinoon gisaysay sa maong pamahayag kun unsa nga partikular nga "administrative sanctions" ang gipahamtang batok sa duha.

Nakasabot ang management nga intensyon sa maong interview mao ang pagtabang sa biktima, apan sumala usab niini nga dili nila isalikway ang gibug-aton sa mga alegasyon kalabot sa "mishandling" sa pag-interview, hinungdan nga usa ka imbestigasyon ang ilang gihimo. "It is our policy as a responsible organization to take any complaint seriously, and we are currently conducting a thorough investigation into this matter," sumala sa maong estasyon sa radyo.

Nisaad ang estasyonan nga mosubay sila kanunay sa mga lagda sa pagpanalipod sa mga kababayen-an ug kabataan.

Giisip niya kaning hitaboa magsilbi nga oportunidad aron mas mapalambo pa ang ilang serbisyo sa publiko pinaagi sa pagpanibya.

"We want to assure the public that we will always uphold the values of integrity, compassion, and responsibility in all our endeavors aimed at helping and inspiring others,"sumala sa Brigada.

Sa laing bahin, ang National Union of Journalists of the Philippines (NUJP) mipagawas sab og pamahayag nga nagkondenar sa gihulagway nilang “unethical interview” sa bata.

Ang NUJP mihangop sa gihimong aksyon sa Brigada apan gusto nilang mopagawas og public apology ang duha ka magsisibya dungan sa pagpahinumdom sa tanan nga ubos sa Section 3 sa Special Protection of Children Against Abuse, Exploitation and Discrimination Act nga bisan unsang buhat o mga pulong nga makapaubos sa dignidad sa batang biktima sa abuso makonsiderar gihapon nga Child Abuse. (BANAT NEWS)