Rapper namusil og langyaw ug laing lalaki nagdala og armas sikop

CEBU, Philippines — Gidakop sa Mabolo Police Station sa Cebu City Police Office ang usa ka local rapper ug singer nga naila sa ngalan nga Range 999 human kini namusil sa usa ka 37-anyos nga American national gawas sa usa ka club diha sa Barangay Lahug, Siyudad sa Sugbo kagahapon sa buntag.

Ang tinuod nga pangalan sa suspetsado giila sa kapolisan nga si Jed Andrew Salera, 26-anyos, lumad nga taga Lungsod sa Boljoon apan kasamtangan nga nagpuyo sa Barangay Bacayan, Siyudad sa Sugbo.

Matud ni Police Major Romeo Caacoy, Jr., hepe sa Mabolo Police Station nga alas 7:00 kagahapon sa buntag nakadawat sila og alarma nga adunay gipusil gawas sa club diha sa Barangay Lahug.

Naabtan sa kapolisan ang langyaw nga nagbuy-od ug nagkadugo diin aduna kini samad pinusilan sa bukton ug tiil.

Ang suspetsado nailhan sa kapolisan pinaagi sa nakuha nga footage sa closed-circuit television (CCTV).

Base sa imbestigasyon sa kapolisna nga sa wala pa nahitabo ang pagpamusil giingong ang grupo sa suspek ug ang langyaw naglamok-lamok na daan diha sa club ug giuwang sila sa mga bouncer.

Nakita sa footage sa CCTV diha gawas sa club ang mga kauban sa suspetsado nga nakigkomprontasi sa langyaw diin usa kanila ang nanisikad ngadto sa biktima.

Pagkataod-taod niabot si Salera sakay sa iyang sakyanan ug deriyot niini maligsi ang biktima.

Niatras ang sakyanan ug niduol ang biktima ngadto sa driver’s side ug gipusil kini sa suspek.

Ang kapolisan nipahigayon og hot pursuit operation diin natultolan nila ang suspek diha sa balay sa iyahang manager sa Sitio Sunshine Valley, Barangay Quiot niining siyudad.

Ang suspetsado nangangkon nga gibastos sa langyaw ang iyahang mga higala nga mga babaye.

Ang suspetsado gikatakdang pasakaan og kasong frustrated murder ug illegal possession of firearms.

Sa laing bahin, nasikop sa Labangon Police Station pinangulohan ni Police Major Eraño Regidor ang usa ka lalake nga nagdala-dala og dili lisensiyado nga armas diha sa Purok Sambag, Barangay Tisa, Siyudad sa Sugbo kagahapon usab sa buntag.

Ang suspetsado mao si Jonas Sumampong Sistiso, hingkod ang panuigon, residente sa naasoy nga lugar.

Matud ni Regidor nga ang maong lalaki adunay kontra nga tanod sa Barangay Tisa.

Giingong nagpabuto kausa sa iyang armas ang suspetsado. (BANAT NEWS)