Mga tinun-an naaktohang naghithit og marijuana

CEBU, Philippines — Nadakpan sa mga sakop sa Tactical Motor Riding Unit (TMRU) sa Cebu City Police Office ang tulo ka mga menor de edad nga nasakpang nag pot session diha sa Baywalk sa South Road Properties, Barangay Sto. Niño, siyudad sa Sugbo kagahapon sa kaadlawon.

Ang maong mga menor de edad nga nag edad og 17 anyos ug 15 anyos ug mga tinun-an. Nasakpan sila nga naghithit og marijuana.

Matud ni Police Lieutenant Colonel Janette Rafter, Deputy City Director for Operations sa Cebu City Police Office nabantayan sa nagpatrolyang TMRU sa Baywalk ang mga menor de edad nga nagyupyop.

Dihang gi-verify sa kapulisan nasakpan ang mga menor de edad nga nag pot session. Gumikan kay nilapas naman sa 15 anyos ang mga nadakpan nga menor de edad pasakaan sila og kaso sa CCPO pinaagi sa pakig-alayon sa City Social Welfare and Development maoy mohatag nila og certificate of discernment.

Samtang nadakpan sab sa mga operatiba sa PDEA-7 ug Cebu City Police Station 4 ang usa ka regional target-listed personality sa ilang buy-bust operation sa Sitio BGA, Barangay Lahug, siyudad sa Sugbo sa miaging adlaw.

Ang suspect mao si Ricky Palanas, 40, on-call mason ug residente sa naasoy nga lugar.  Nakuhaan ang dinakpan og upat ka putos aa gituohang shabu nga nitimbang og 20 gramos ug mobalor og P136,000 ug buy-bust money.

Ang mga ebidensiya nga nakuha gisumetir na sa laboratory alanchemical analysis ug proper disposition.

Samtang duha ka mga lalaking walay  mga trabaho nga namaligya og ilegal nga drugas ang gipangdakop sa kapolisan sa Dakbayan sa Talisay diha sa Purok Matinumanon, Barangay Tabunok tungang gabii sa miaging adlaw.

Ang subject sa operasyon mao si Windel Tangayan Gabasa alyas Atla, 38, nagpuuo sa maong lugar.  Nadakpan sab ang kuyog niya nga si El Rico Narboada alyas Eric, 27.

Si Police Lt. Col. Wayne Magbanua, hepe sa kapolisan sa Talisay miingon nga 60 gramos nga gibana-banang balor P408 mil ang nakuha sa operasyon.

Ang mga dinakpan pasakaan sab ang dinakpan og kalapasan sa Sections 5 ug 11, Article II sa Republic Act 9165. --  IBM BANAT NEWS