Away sa drugas, amigo giunay og patay

CEBU, Philippines — Patay ang usa ka 45-anyos nga lalaki human siya gipusil sa iyang amigo didto sa Purok Aliños, Sitio Mananga 1, Barangay Tabunok, Dakbayan sa Talisay niadtong Huwebes sa gabii.

Ang biktima nailhan nga si William Sasareta Abadiano, nagpuyo sa maong lugar. Samtang ang suspek nahibaw-an nga si Warren Sabanal.

Sa imbestigasyon sa kapolisan pinaagi sa pakighinabi sa igsuon sa namatay nga nakadungog siya og upat sipa nga boto sa armas.

 Sa iyang pagsusi iyang nakita ang iyang igsuon nga adunay samad pinusilan diha sa iyang dughan. Nisibat rasab dayon ang suspek palayo sa lugar.

Ang kapuyo sa namatay niingon nga naligo ang biktima dihang kalit naabot ang suspek ug diretso kining gipusil.

Gidala nila ang biktima sa Cebu South Medical Center pinaagi sa pagsakay og traysikol apan si Police Lt. Col. Wayne Magbanua, hepe sa kapolisan sa siyudad  miingon nga nakabsan gyud sa kinabuhi ang biktima.

Iyang nahibaw-an nga pulos nalambigit sa ginadiling drugas ang biktima ug ang suspek.  Gani amigo ang duha pero kay nag away tungod gihapon sa ilegal nga drugas.

Padayon ang pagpangita sa kapolisan ngadto sa suspetsado.— IBM BANAT NEWS