Karaan nga Pasil Market butangan og tunghaan
CEBU, Philippines — Gipahibawo ni Eugene Mercado, ang acting manager sa karaang Pasil Public Market nga dunay edipisyo sa karaan nga merkado ang himoon nga eskwelahan.
Suma pa ni Mercado nga usa ka bahin sa Phase 2 building sa karaang merkado ang gitagana alang sa tunghaan agig tubag usab sa hangyo sa barangay Suba.
Una niini nihangyo ang mga opisyal sa Barangay Suba nga makabaton og tunghaan human ang Barangay Pasil ug Sawang adunay ilang kaugalingon nga tunghaan.
Dugang pa ni Mercado nga usa sa plano ni Cebu City mayor Michael Rama ang pag convert sa pipila ka bahin sa karaang merkado tungod kay ang operation niini ibalhin man ngadto sa Pasil Fish Market.
Sa higayon nga mapatuman kini ibalhin usab ang opisina sa merkado ngadto sa bag-ong merkado sa Pasil.
samtang sa laing bahin tinguha ni Cebu governor Gwendolyn Garcia nga madugangan og skwelahan ang Philippine Science National High School (PSNHS) sa Probinsya sa Sugbo.
Si Garcia mihulagway sa maong skwelahan nga "synonymous with academic excellence" ug angayan nga palapdan pa ang campus niini.
"Because I know that with the rigid discipline and training of the Phillippine Science National High School, you know, we are assured with the cream of the crop" matod ni Garcia atol sa Provincial Development Council meeting.
Ang representante gikan sa PSNHS nagkanayon nga adunay pending nga balaod karon sa kongreso nga gitawag og Philippine Science National High School Expansion Law diin magdugang og laing campus sa PSNHS apan ang proponent niini gikan sa Probinsya sa Bohol.
Subay niini ang gobernador niawhag sa mga mayor sa Sugbo nga mohimo og representation sa mga kongresista aron makahimo og balaudnon pag establisar og laing campus sa PSNHS sa Probinsya sa Sugbo sama sa gihimo sa Cebu Normal University ug Cebu Technological University (CTU) diin daghan na ang natukod nga mga campus sa Probinsya sa Sugbo. — /MEL (BANAT NEWS)
- Latest
