Durugista suspek usab sa pagpangawat og mga cellphone

CEBU, Philippines — Nahibalik ngadto sa mga tag-iya ang mga cellphone nga kinawat human usab sa pagkasikop atol sa buy bust operation sa kapolisan sa notadong kawatan diha sa Barangay Buagsong sa Lungsod sa Cordova.

Si Police Major  Michael Gingoyon, hepe sa Cordova  Police Station maoy nangulo sa buy bust operation diin ilang nasikop ang 40-anyos nga pusher nga ilang nahibaw-an nga notado usab nga kawatan tungod sa daghan na nga mga biktima niini nga mga silingan. Giingong giangkon sa suspetsado ngadto sa mga polis ang mga pagpangawat og cellphone nga iyang gihimo nga ang kadaghanan sa mga biktima ang iyang mga silinan nga tinun-an. Gitug-an usab sa suspetsado ngadto sa grupo ni Gingoyon ang mga pawnshop nga iyang giprendahan sa mga butang nga iyang kinatawat.

Gipaningkamotan nila ni Gingoyon nga mahibalik ngadto sa mga tag-iya ang maong mga cellphone hinungdan nga nihimo sila og follow up operation pinaagi sa pagsusi sa mga pawnshop base usab sa gitug-an sa suspetsado ngadto kanila.

Ang suspetsado natanggong karon sa detention cell sa Cordova Police Station ug gikatakda kining pasakaan og kaso sa kapolisan sa kalapasan nga iyang nahimo.

Giawhag sa kapolisan sa lungsod ang mga molupyo nga pabiling mag matngon ug i-report ngadto kanila kon adunay mga tawo sa ilang dapit nga kadudahan ang mga lihok aron mahatagan nila kini og dinaliang aksyon. — /BDB (BANAT NEWS)