Magsuon nakuhaan og 10 kilos nga shabu
CEBU, Philippines — Nadakpan hiniusang buy-bust operation sa Regional Police Drug Enforcement Unit (RPDEU)-7, Philippine Drug Enforcement Agency (PDEA)-7 ug Police Drug Enforcement Group Special Operations Unit (PDEG-SOU)-7 ang magsuon nga nakuhaan og 10 kilo nga gituohang shabu diha sa A. Soriano Avenue, Barangay Carreta, siyudad sa Sugbo kagahapon sa alas-6 sa buntag.
Ang subject sa buy-bust operation mao ang manghod nga si Jaime Auxtero Dajao, 47, ug apil sa gidakop ang iyahang maguwang nga si Roberto Auxtero Dajao, 53, ang duha pulos taga Barangay Tanghalige, Lungsod sa Talibon, Probinsya sa Bohol.
Nasakmit sa mga operatiba ang ang 10 kilos sa gituohang shabu nga mokantidad og P68 milyones.
Matud pa ang manghod giingong nagsilbi nga bodegero sa illegal nga drugas sa usa indibidwal nga ginganlan og Leon ug maka dispose matud pa kini og 10 ngadto sa 20 kilong shabu kada buwan ug ang iyahang area of operation mao ang Cebu, Mandaue, Lapu-Lapu ug pipila ka lugar sa Probinsiya sa Sugbo.
Sa impormasyon nga gihatag sa kapulisan, si Jaime nadakpan na niadtong May 25, 2020 gumikan gihapon sa kalambigitan sa illegal nga drugas diin nakuhaan kini og upat ka kilong shabu nga nagkantidad og P27 million.
Apan na-dismiss ang kaso hinungdan nga nakagawas kini sa prisuhan niadtong buwan sa Disyembre sa miaging tuig.
Samtang ang maguwang niini nga apil sa gidakop matud pa nagsilbi nga driver dihang gihimo ang buy-bust operation. Gisuwayan og kuha ang habig sa mga dinakpan apan nagdumili sila sa pagtingog. Nagsakyanan ang duha sa dihang gihimo ang transaksyon.
Wala gisalikway kapulisan nga kauban sa mga suspetsado ang mga una na nilang nangadakpan kay parehas nga Chinese teabags ang gisudlan sa shabu. (BANAT NEWS)
- Latest
