Senior, laing walo sikop sa drug den

CEBU, Philippines — Nagpahigayon og managlahi nga operasyon ang Philippine Drug Enforcement Agency (PDEA) -7 ug Cebu City Police Office sa unang adlaw sa buwan sa Marso nga miresulta sa pagguba sa drug den ug pagdakop sa siyam ka mga ilegalista diin upat niini recidivist o nakakompleto na kaniadto og drug rehabilitation ug usa ang job order employee sa barangay.

Pasado ala 1 sa hapon sa adlaw'ng Biyernes usa ka operasyon ang gihimo  diha sa Sitio Rainbow Village, Barangay Kinasang-an nga nadeklarar nga drug cleared ug walo ka tawo ang nadakpan.

Nadakpan ang subject sa operasyon ug drug maintainer nga si Yulindo Navarro, 59 anyos, wala'y trabaho kinsa boluntaryong mi-surrunder ug nakakumpleto sa Kinasang-an Community Based Drug Rehabilitation Program (CBDRP) kaniadto.

Nasakpan sab sa drug den ang Barangay Job Order driver nga si Nestor Serdan, 72 anyos ug duha nga boluntaryo sab ni surrender ug nakakumpleto sa CBDRP nga sila si Chuckie Villeno, 36, water shop helper, ug Jazz Delos Reyes Quilario, 39, construction painter.

Laing nadakpan ang upat nga tigbisitahan sa drug den nga sila si Lexter Abaquita, 31, tailor; Glen Padinas, 39, jeepney driver; Norman Larawan, 42, jeepney driver; ug Felix Tantiado, 56, walay trabaho.

Nakuha gikan sa mga dinakpan ang 11 ka putos sa gituohang shabu nga nitimbang og 11 grams ug mobalor og P74, 800, buy-bust money ug mga drug paraphernalia.

Samtang sa alas 4:06 sa hapon sa samang adlaw, laing operasyon ang gihimo diha sa A. Borres Street, Barangay Suba, Cebu City ug nadakpan ang usa ka target-listed personality..

Ang subject sa operasyon map si Joemari Tagalog, 30 , kinsa ni-surrender sab kaniadto ug nakakumpleto sa CBDRP sa Barangay Suba.

Nakuha niya ang ang walo ka putos sa gituohang shabu nga niabot og 30 grams ug mobalor og P204, 000, buy-bust money ug mga drug paraphernalia.

Ang mga ebidensya nga nakuha gisumetir sa laboratory alang sa chemical analysis ug saktong paghipos.  Gikatakda nga pasakaan og kasong kalapasan sa Republic Act 9165 ang mga suspetsado.

Gihulagway sa PDEA-7 nga ang Barangay Anti-Drug Abuse Councils (BADAC) ilabi na sa drug cleared Barangays dunay importante nga papel sa pag monitor sa drug situation sa ilang mga lugar.

Apil na niini ang estado sa nakakumpleto sa CBDRP ug obligado silang mo report dayon sa otoridad bisan unsang illegal drug activities nga gikalambigitan aning mga nakakompleto sa drug rehab ug pangusgan ang drug-free workplace policies aron pagsigurong walay durugista sa mga barangay employees. (BANAT NEWS)