Kapin sa P30M shabu sakmit sa Bohol ug Cebu City
CEBU, Philippines — Nikabat ngadto sa 4,030 ka gramong shabu nga nikantidad ngadto sa P27.4 milyones ang nasakmit atol buy-bust operation sa Provincial Intelligence Unit sa Bohol Police Provincial Office niadtong Martes sa gabi isa Purok 7, Barangay Mansasa, Dakbayan sa Tagbilaran.
Nasikop sa maong operasyon ang managkapuyo nga sila si alyas “Johny” ug alyas “Mary”, 24 ug 19-anyos, mga residente sa Barangay Bool, sa maong siyudad.
Matud ni Police Lieutenant Colonel Norman Nuez nga si Johny bodegero sa ilegal nga drugas samtang si Mary maoy mo apod-apod sa shabu ngadto sa ilang mga hatdanan.
Giingong adunay manawag kang Johny nga mopahibawo nga hatdan siya og ilegal nga drugas nga moabot sa upat ngadto sa lima ka kilo ug bahigon nila kini ngadto sa tagpila ka gramo depende sa minudo.
Matud sa kapolisan nga mga suspetsado giingong bayran og P50,000 kada kilo nga ilang ma-dispose nga iagi sa e-wallet.
Samtang nasikop sa buy-bust operation sa City Intelligence Unit sa Cebu City Police Office (CCPO) si Alyas “Mike”, 29-anyos diha sa dalan Villalon Drive, Barangay Capitol Site, Siyudad sa Sugbo niadtong Martes usab sa gabii. Ang suspetsado taga Barangay Gutlang, Lungsod sa Argao nasakmitan og 705 gramong shabu nga nibalor ngadto sa P4.7 milyones. (BANAT NEWS)
- Latest
