Abogada ang usa sa napatay kauban sa NPA?

CEBU, Philippines — Nakigalayon ang Police Regional Office-7 sa Integrated Bar of the Philippines aron sa pagkompirmar sa report nga ang usa sa mga napatay sa engkwentro sa Bilar, Bohol niadtong Biyernes sa buntag usa ka abogada.

Nanggawas sa mga posts sa social media nga ang usa sa napatay sa engkwentro sa Purok Matin-ao 2, Barangay Campagao, Lungsod sa Bilar, Probinsiya sa Bohol nga si alyas Maya mao si Hannah Jay Cesista.

Si Cesista  bag-ohay lang nakapasar sa  Bar Examination sa tuig 2023. Gusto masayran sa PRO-7 pinaagi sa IBP ug sa mga kabanay ni Cesista kun tinuod ba ang maong mga nanggawas nga report.

Una niini, nanggawas sa social media nga si alyas Maya ug Hannah Jay Cesista nga ika 925 sa listahan sa mga nakapasar sa Bar Examination sa miaging tuig usa ra.

Matud ni Police Lieutenant Colonel Gerard Ace Pelare, tigpamaba ni PRO-7 Regional Director Brigadier General Anthony Aberin nga sa impormasyon nga ilang nakuha dili layo ang posibilidad nga usa ra kini ka tawo apan gusto mohimo gyud nila nga mohimo og validation ug confirmation.

“Actually, there’s already a coordination between the PNP and the family to check really if si Attorney Cesista gyud ‘tong one of the dead person or dead suspects,” sigon ni Pelare.

Nakig-alayon ang kapulisan sa pinakaduol nga paryente o kabanay sa mga namatay ug kun duna sila’y mga dokumento nga makapakita nga kabanay o paryente nila ang mga nakalas sa engkwentro makuha nila ang patay’ng lawas.

“We will coordinate with the nearest keen sa mga suspects nato then with the presentation of the appropraite documents then they will be release after all the process are undertaken,” ni Pelare pa. Si Pelare mibutyag nga ang subject sa operasyon niadtong hitabo nga si Domingo Ompoc alyas Silong ug giingong lider sa kalihokan sa NPA sa maong dapit, lumad nga taga Barangay Campagao diin nahitabo ang engkwentro.

Bisan lumad sa maong lugar si Compoc idlas kaayo kini kay magsige kini og larga sa laing lugar. Gani na-monitor sab kini didto sa Probinsiya sa Negros Oriental nga diin dunay aktibong kalihokan sa NPA.

Si Ompoc most wanted person sa Bohol tungod sa kasong rebellion, homicide, attempted homicide, multiple murder, frustrated murder ug robbery ug taod-taod na nga gipangita sa kapulisan.

 Base sa assessment sa PRO-7, huyang na ang mga NPA sa Negros ug Bohol ug sa dili madugay mapapas na kini tungod sa subsob nga operasyon sa kapulisan ug militar ug pagkawala na sa ilang mga supporters sa masa.

 “If proven true nga ang katong usa sa mga namatay usa ka lawyer then makita nimo ang level of deception and this is a very cruel ideology, another life, another future is destroyed. Just imagine how the parents and the family feel, ilahang gipa eskwela ilahang anak, gigastuhan then nahimong usa ka abogado apan gi deceived aning sayop ug very cruel nga ideolohiya sa NPA,” asoy ni Pelare.