15 ka balay naugdaw sa sunog sa Talisay

CEBU, Philippines — Miabot sa 15 ka panimay ang naugdaw atol sa sunog nga mitumaw sa Purok Kamunggay, Lower Mahayahay, Barangay Candulawan, Dakbayan sa Talisay niadtong Miyerkules sa hapon.

Si FO1 Jerome Dolauta sa Talisay City Fire nibutyag nga nagsugod ang sunog mga alas 4:34 sa hapon.

Giisa sa first alarm ang sunog mga alas 4:42 sa hapon hangtud nga nakontrolar kini mga alas 4:55 sa hapon dayon alas 4:58 na fire out.

Nitala sa 21 ka pamilya ang apektado nga adunay 87 ka indibidwal.

Gibana-bana sa kabumberohan nga niabot sa P675 mil ang danyos.

Padayon ang pag imbestiga sa kabumberohan sa kung unsay hinungdan maong sunog.

Apan si Konsehal Jonathan Concial sa Candulawan niingon gisubay nila taho nga pagbuto sa butane maoy sinugdanan sa sunog.  Gikaingon nga nagluto ang bata gamit ang butane apan niulbo kini.

Apan usa ka ginang ang nihimakak sa taho ug nipasabot nga wala magluto ang iyang apo tungod kay wala man sab silay lung-agonon.

Hinuon ang ilang atop duol o sikit sa poste sa kuryente ug dunay miingon nga nakit-an nilang ni-spark kini dayon misilaob ang kayo. Ang mga apektado nga pamilya gipahiluna sa basketball gym sa Candulawan.

Si Mayor Gerald Anthony “Samsam” Gullas nimando sa City Social Welfare and Development (CSWD) nga tagaan dayon sa dinaliang tabang ang apektadong pamilya.

Nihangyo si Gullas ngadto ni kongresista Rhea Gullas kung unsa man ang mahatag nga tabang para sa mga nasunogan.—  IBM BANAT NEWS