Drag race, borabora gidili diha sa Aviation Road

CEBU, Philippines — Hingpit nga ginadili ni Mayor Junard “Ahong” Chan ang drag race, pagsaba-saba sa karsada ug ingon man paggamit sa tambutso nga bora-bora ug pagpataka og labay sa basura ngadto sa General Aviation Rd, sa Lapu-Lapu City diin adunay mga ginagmay nga mga paninda sama sa mga street foods, mga ilimnon, iced coffee, kan-anan ug uban pa matag gabii.

Ang maong pagpahibalo gi-anunsyo ni Chan niadtong Biyernes sa gabii pinaagi sa Facebook Live diin nagpahigayon usab siya sa iyang inspection sa maong dapit.

Matud pa sa mayor ngadto sa iyang Facebook Live nga adunay mga reklamo ang niabot sa ilaha nga adunay mga kalihukan sama sa drag race, paggamit sa tambutso nga bora-bora ug pagsaba-saba sa karsada kung moabot na ang kagabhion.

Ang General Aviation Rd, adunay lapad nga karsada diin adunay mga paninda nga gi-display matag gabii, sanglit maanindot kini nga lugar tungod kay mao man usab kini ang dapit nga malantaw ang Mactan Cebu International Airport sa Lapu-Lapu City.

Sa laing bahin gikalipay usab ni Chan ang pagdagsa sa mga paninda sa maong dapit kay timaan kini nga adunay mga nanginabuhi ug nabuhi bisan sa ginagmay lamang nga mga negosyo.

Gidugang usab sa mayor nga wala ginadili ang pag-istambay ug pagpamaligya sa maong dapit apan mo kooperar lamang usab sa pagpanlimypo ug dili magpataka og labay sa basura, ingon man pagsaba-saba sa maong dapit aron mapabilin ang kahapsay ug kalinaw inig abot sa gabii.

Gipahibaw usab sa maong mayor nga matag gabii magronda ang kapulisan sa Lapu-Lapu City sa Aviation Rd alang sa pagmando sa kahapsay ug kalinaw, diin mo dagsa ang mga manindahay ug mamalitay.

Giawhag sa mayor ang Oponganon pagsumbong kung duna silay makit-ang nag drag race diha sa karsada. – Theresa March P. Valle, IBM BANAT NEWS