P75 milyong shabu nasakmit sa operasyon

CEBU, Philippines — Moabot sa P75 milyones nga balor sa illegal nga drugas ang nasakmit sa kapulisan sa Police Regional Office(PRO)-7 sa ilang buy-bust operation sa managlahi nga lugar sa Siyudad sa Sugbo.

Alas 8 sa gabii sa adlaw'ng Sabado nadakpan sa hiniusang buy-bust operation sa Regional Police Drug Enforcement Unit-7, PNP Drug Enforcement Unit-7 ug Philippine Drug Enforcement Agency-7 ang High Value Individual diha sa A. Soriano Avenue, Barangay Carreta, Siyudad sa Sugbo tupad sa LUDO Memorial Park.

Ang dinakpan mao di Elmer Saguran Barioga, 31, alyas Budok lumad nga taga Agusan Del Norte nga nakuhaa og 10 ka kilong gituohang shabu nga mobalor og P68 milyones.

Ang mga drugas giputos og tea bag unya ang uban kay giputos og packaging tape ug gisulod kini sa backpack sa suspetsado.

Matod pa sa dinakpan nga bag-ohay lang siya sa maong illegal nga kalihukan ug giingong gisugo lang siya sa iyang nakaila sa Luzon diin usab gikan ang drugas pinaagi sa land travel gikan sa Manila paingon sa Batangas dayon sa Matnog ug katapusan ang Cebu.

Kun ma-deliver niya ang mga illegal nga drugas bayran matod pa siya og P10,000.

Samtang pagka alas 10:15 sa samang adlaw, nadakpan sa sa City Intelligence Unit sa Cebu City Police Office ang 22-anyos nga si Christian Dave Canoy alyas "Boshook", residente sa Urgello Street, Barangay Sambag 1, Cebu City.

Si Canoy giingong miyembro sa Joel Paca Drug Group didto sa Nichols Heights, Barangay Guadalupe sa Cebu City.

Nakuhaa kini og 1,055 grams sa gituohang shabu nga mobalor og P7.1 million.

Si Canoy matud pa bag-ong sulbong nga drug personality ug giingong ang contact niini sa iyang illegal nga drugas naa sulod sa usa ka jail facility.

Ang area of operation niini ang Barangay Apas ug ubang dapit sa Cebu City pinaagi sa iyang 500 gramos ngadto sa usa ka kilo nga shabu kada semana.

Niangkon ang dinakpan nga bag-o lang siya nisulod pag-deliver og illegal nga drugas ug wala siya kaila sa nagsugo niya nga kasagaran pinaagi sa text ug kun malampuson suholan siya sa nagsugo.

Ang mga nadakpan pasakaan og kasong kalapasan sa Republic Act 9165 kun Comprehensive Dangerous Drugs Act of 2002 karong adlawa.

Gihulagway ni PRO-7 Regional Director Brigadier General Anthony Aberin nga dako og epekto sa supply sa illegal nga drugas sa mga illegalista ang pagkasamit niinibug daghang kinabuhi ang maluwas nga dili magumon sa illegal nga drugas.

"This highly-impactful operational accomplishment is calculated to inflict a major blow to the illegal drug trade in Central Visayas in line with the BIDA Program of SILG Atty. Benjamin Abalos Jr. and the instruction of the Chief PNP to conduct honest and transparent anti-drug operations.  I assure you that this aggressive campaign will never stop until the last trafficker is put to jail," sigon ni Aberin.  — /IBM

(BANAT NEWS)