HPG-7: Bawal ang blinkers, wang-wang sa sibilyan

CEBU, Philippines — Ang Highway Patrol Group (HPG)-7 namahayag nga dili gyud pwede mogamit og blinkers ug wangwang sa ilang mga sakyanan o motorsiklo ang mga sibilyan.

Sigon ni Police Lieutenant Colonel Wilbert Parilla, Regional Chief sa Highway Patrol Group (HPG)-7 base sa Republic Act 4136 kun Land Transportation and Traffic Code tulo ra ang gitugutan nga pwede mogamit niini.

Kini mao ang mobile patrol sa Philippine National Police, mga ambulansiya ug sakyanan sa Bureau of Fire Protection nga gamiton sa emergency calls.

"Kung makakita mo og Barangay( service) nga dunay mga blinkers ila nang gihimo nga ambulance and then ilaha ng ipa accredited sa atong mga local hospitals para magamit siya, ma considered siya as ambulance," matud ni Parilla.

Kadtong mga sakyanan nga bag-ong mapalit sa Local Government Units unya aduna nay blinkers daan kinahanglan dunay polis nga sakay niini ug gigamit isip mobile or patrol cars atol sa implementasyon sa traffic violations.

Sa miaging tuig daghan og na-isyuhan og Temporary Operator's Permit (TOP) ang HPG-7 tungod sa maong kalapasan.

Matud niya, 66 ka tawo ang naisyuhan og TOP  tungod sa  pagbutang og blinkers, pito ang wangwang (siren), unom sab tungod sa busina nga banha kaayo, 213 ang led Lights nga hayag kaayo, 23 strobe lights, unom sa fog lights ug 14 sa modified mufflers.

"Tungod lang gyud sa kagamay sa atong HPG personnel so dili gyud nato mabantayan tanan," ni Parilla pa. IBM BANAT NEWS