CPPO: Dili magpakatap og impormasyon nga dili kompirmado

CEBU, Philippines — Nanawagan ang Cebu Police Provincial Office (CPPO) sa publiko ilabi na sa Probinsiya sa Sugbo nga likayan ang pagpakatap og mga impormasyon nga dili kompirmado aron dili makamugna og kabalaka sa katawhan.

Ang CPPO niluwat sa maong panawagan human sa mga nikatap nga mga estorya diha sa social media sa giingong pagpanggawas sa mga bitin ilabi na cobra ug nakit-an diha sa pipila ka mga lungsod sa Probinsya diin dili pa kini kompirmado.

Giawhag sa kapolisan ang katawhan ilabi na sa mga dapit nga adunay sightings sa bitin sama sa cobra nga mahimong alerto.

Matud sa kapolisan nga dili angayang mag-panic ug tawagan dayon ang opisyales sa barangay, Municipal Disaster Risk Reduction and Management Office ug Department of Environment and Natural Resources aron maaksiyonan dayon kini.           

Ug kong mapakaan og bitin modangop dayon sa pinakaduol nga tambalan aron maatiman.

"Rest assured that we have coordinated the Department of Environment and Natural Resources regarding the snakes sightings in the province and all concerns regarding with the sightings of cobras in the Province of Cebu duly noted by the DENR in coordination with our PNP", matud ni Police Major Windel Abellana, tigpamaba sa Cebu Police Provincial Office.

Sayo pa, naukay ang katawhan dili lang sa Lungsod sa Dalaguete apil na ang laing mga lugar sa nahitabo kang Maximo Milan, 64-anyos kinsa napalgang wala nay kinabuhi ug gituohang gipaak og bitin samtang nangumpay diha sa Barangay Babayongan, Lungsod sa Dalaguete.

Nunot sa maong hitabo, girekomendar sa CPPO nga ipaubos sa autopsy ang patay'ng lawas sa biktima aron masuta ang hinungdan sa kamatayon niini ilabi na nga walayy nakakita sa nahitabo sa biktima.

Kombinsido si Fanny Cahigao, kabanay sa biktima nga king cobra ang nakapatay sa iyahang uyoan tungod kay sa wala pa ang insidente nakakita na sila og duha ka king cobra diha sa ilang lugar. (BANAT NEWS)