Duha patay sa aksidente sa kadalanan

CEBU, Philippines — Patay ang usa ka motoristang babaye ug grabe usab nga naangol ang 16 anyos nga babaye nga angkas niini sa dihang nadasmagan sila og wing van  diha sa dalan national sa Sitio Libo, Barangay Tayud, Lungsod sa Consolacion alas-2 pasado ang takna sa miaging Domingo sa hapon.

Ang namatay mao si Marjorie Labandria, taga Barangay Talamban sa Siyudad sa Sugbo.

Si Police Staff Sergeant Cresenciano Saladaga sa Traffic Section sa Consolacion Police Station miingon nga dunay gilikayang kasugat nga bisekleta ang biktima apan nawad-an sa kontrol ang dagan sa gimaneho niining motorsiklo.

Ang nagsunod nga wing van nga gimaneho ni Rey Qjimada, 58, nga kusog usab nga nagpadagan wala na makahunong pa ug nadasmagan ang motorsiklo sa biktima.

Gumikan sa kakusog sa impact nalamba ang motorsiklo ug naligsan ang biktima apan nalagpot usab paingon sa daplin sa dalan ang minor de dead nga babaye nga angkas niini.

Dali unta nga gidala sa tambalanan ang duha apan si Labandia nga nakaangkon og grabeng kadaut sa iyang kalawasan gideklarar sa mga doktor nga dead on arrival. Matud pa ni Saladaga nga si Quimada pasakaan og kasong reckless impudence resulting to homicide.

Sa laing aksidente, patay sab ang usa ka 57 anyos nga lalaking nagbisekleta human siya nadasmagan og awto diha sa Cebu South Coastal Road (CSCR) sa habig sa Barangay San Roque, Dakbayan sa Talisay niadtong Domingo sa buntag.

Ang biktima mao si Freddie Marimat nga taga Inayawan, Syudad sa Sugbo nga nagbisekleta siya niadtong higayona.

Samtang ang nakadasmag kaniya mao si Euseben Cabo, 35 anyos.

Si Jonathan Tumulak, pangu sa City of Talisay-Traffic Operation Development Authority (CT-TODA) nagkanayon nga pulos paingon habagatan ang duha.

Gikaingon nga ang drayber sa awto gikan pa nga miapil og lumba og dagan ug nakatagpilaw kini samtang nagmaneho.

Gidala pa sa tambalanan ang biktima apan nakabsan kini sa kinabuhi.

Giandam sa kapolisan ang kaso nga reckless imprudence resulting in homicide and damage to property batok sa drayber.