Babaye nakuhaag P20 milyong shabu

CEBU, Philippines — Nasakmit sa mga sakop sa City Drug Enforcement Unit sa Mandaue  City Police Office ,( MCPO)  ang tulo ka kilong shabu nga nagkantidad og P20.7 milyones  gikan sa babayeng gikonsiderar nga High Value Individual sa kampanya batok ilegal nga druags sa kapolisan.

Ang operasyon nahitabo diha sa dalan ML Quezon sa Barangay  Casuntingan sa Siyudad sa Mandaue  sa miaging kaadlawon nga niresulta sa pagkasikop kang Marichu Oyon-Oyon Anura, 41, taga Siyudad sa Sugbo apan kasamtangan nga nagpuyo sa Barangay Cabancalan sa Siyudad sa Mandaue.

Si Police Lieutenant Wilfredo Alarcon, pangulo sa CDEU sa MCPO nga nakadawat na sila og mga impormasyon labot sa ilegal nga kalihokan sa maong dinakpan tulo ka buwan na ang nakalabay mao nga ilaha kining gipanid-an.

Dihang nakompirmar ang impormasyon, gilusad dayon ang buybust operation.

Si Police Regional Office-7 Director Brigadier General Anthony Aberin miingon nga high-impact operation ang gihimo sa MCPO nga resulta sa makuting surveillance, casing ug intelligence works.

Matud ni Aberin mao kini ang unang major anti-illegal drugs accomplishment sa tuig 2024 ug magsilbi kining template sa level sa ilang pagka agresibo aron pagsumpo sa problema sa illegal nga drugas sa Central Visayas.

Matud niya katumanan sab kini sa BIDA program ni Department of Interior and Local Government Secretary Benjamin Abalos Jr. ingon man ang five-focused agenda ni Chief PNP Benjamin Acorda Jr.

Ang dinakpan matud pa bodegera og shabu ug maka-dispatsar og duha ngadto sa tulo ka kilong shabu matag semana diha sa Mandaue, Cebu City ug Lapu-Lapu City.

Sa laing operasyon batok ilegal nga drugas,  pasakaan og kasong kalapasan sa Section 5, Article II sa Republic Act 9165 ang usa ka target-listed drug personality nga nadakpan sa Philippine Drug Enforcement Agency (PDEA) -7, NAVFORCEN ug Cebu City Police Station 8 sa buy-bust operation sa Sitio Tawagan 2, Barangay Sirao, Siyudad sa Sugbo, Biyernes sa hapon, Enero 5, 2024.

Giila ang dinakpan nga si Venris Jay Bonghanoy, 25 anyos, wala'y trabaho ug residente sa maong lugar.

Nakompiskar sa maong operasyon ang duha ka putos sa gituohang shabu nga motimbang og 50 grams nga mobalor og kapin sa P300 mil, buy-bust money, ug usa ka cellphone.  IBM, BANAT NEWS