Giagian sa sakyanan ni Unchuan nasubay sa CPPO
CEBU, Philippines — Nasubay sa kapolisan sa Cebu Police Provincial Office (CPPO) ug City of Naga ang giagian sa sakyanan ni Joel Jude Suson Unchuan o Coach J .
Sayo pa, si Unchuan napalgan nga wala nay kinabuhi diha sa mingaw nga dapit sa Sitio Palanas, Barangay Inyagan, Dakbayan sa Naga sa niaging mga adlaw.
Gibutyag sa kapolisan nga na-recover nila ang sakyanan sa biktima nga Toyota Fortuner nga metallic brown.
Nasayran usab pinaagi Global Positioning System sa sakyanan sa biktima ang giagian niini ug ang kataposang dapit nga giadto ni Unchuan.
Kini maoy gisubay karon sa kapolisan sa ilang backtracking sa mga footage sa closed circuit television (CCTV) camera.
Gibutyag ni Police Lieutenant Colonel Gerard Ace Pelare, tigpamaba sa Police Regional Office-7 nga gisubay sa kapolisan ang lihok sa biktima apil usab ang maong sakyanan.
"Ang atong mga investigators on the ground they were able to track movements of the victim before the incident, so we are continuously backtracking of CCTVs", matud ni Pelare.
Ang sakyanan sa biktima gibilin kini diha sa national highway sa Barangay Yati, Lungsod sa Liloan ug nabantayan nalang sa mga trabahante sa car wash nga abli pagka- alas 6:00 sa buntag sa Disyembre 31, 2023.
Gipahibawo dayon nila ang kapolisan ug nianang Enero 1, 2024 gikuha sa CPPO ang sakyanan ug gikustodiya.
Gikatakdang ipaubos sa forensic examination ang maong sakyanan. (BANAT NEWS)
- Latest
