Kaso batok ni Geverola huyang— piskalya
CEBU, Philippines — Tungod sa pagbasura sa Cebu City Prosecutor’s Office sa kasong robbery in band ni Jigger Geverola gumikan sa kakuwang sa mga ebidensiya nga duna kini kalambigitan sa pagpanulis sa Oro Sugbo Pawnshop and Jewelry Store niadtong Nobiyembre 25, 2023, gimando sa Police Regional Office(PRO)-7 nga palawman pa ang imbestigasyon ug manghipos og dugang ebidensiya bahin sa maong kaso.
Kini aron ma-file og balik ang kaso tungod kay ang desisyon nga gipagawas sa Cebu City Prosecutor’s Office: ‘dismiss without prejudice’ buot pasabot mahimong ma re-file ang kaso kung makahipos og dugang ebidensiya nga makapalig-on sa ilang kaso.
Kahinumduman, sa resolusyon nga gipagawas ni Assistant City Prosecutor Misty Leah Escolar-Hupp nga giaprubahan ni Deputy City Prosecutor Maria Luisa Ratilla nakalatid didto nga wala’y igong ebidensiya nga magpamatuod nga si Geverola nalambigit gyud sa maong krimen, wala say na-establisar nga prima facie case batok kang Geverola.
Kini midugang nga ang confession sa duha ka akusado nga sila si Jordan Baquiano ug Dan Carlo Flores dili paigo aron ilambigit si Geverola sa kaso subay na sa ‘res inter alios acta’ rule nga nagpasabot nga ang ebidensiya batok sa uban dili pwedeng ipahid sab sa uban o gamiton batok sa lain.
Gihulagway sab nga ang extra-judicial confession nilang Baquino ug Flores matud pa wala maglakip sa tanang rekisito nga nakalatid sa balaod. Gani wala gyud maestablisar nga nakigkunsabo si Geverola sa duha paghimo sa maong krimen.
"In this case, not all of the foregoing requisites are present. The existence of a conspiracy involving Jigger has not been sufficiently established,” tipik sa resolusyon.
Si Police Lieutenant Colonel Gerard Ace Pelare, tigpamaba sa PRO-7 miangkon nga dunay ebidensiya apan dili paigo rason nga na-dismiss ang kaso apan siya miingon nga kun mapun-an ug mas lig-on nga ebidensiya mahimo nilang isang-at pag-usab ang kaso.
Sa pagkakaron, wala gisalikway sa kapulisan ang kalambigitan ni Geverola sa krimen, naay mga ebidensiya matod pa labot niini apan nasabtan nila ang baruganan sa Department of Justice gumikan sa bag-ong standard sa pag-file og kaso nga “reasonable certainty of conviction” nga susama sa prima facie evidence o lig-ong ebidensiya ang piskalya aron masigurong makombikto ang gipasanginlan.
Giingon nga ang kapulisan nigamit og ‘lower standard’ base sa “probable cause based on personal knowledge of facts and circumstances” ug mao ra kini ilang gisaligan sa pagsang-at sa kaso.
“This is the basis why the police pushed through with the case. We have probable cause and we stand by that, respectfully,” tipik sa pamahayag ni Pelare. — IBM (BANATNEWS)
- Latest
