Kapolisan naniguro sa seguridad sa Misa de Gallo  

CEBU, Philippines —  Mga police station commanders sa tanang 11 ka police stations sa Cebu City Police Office (CCPO) gimandoan na nga makigalayon sa tanang mga simbahan ubos sa ilang hurisdiksyon aron tukion ang tagsa-tagsa ka plano sa seguridad nunot sa nagsingabot nga Misa de Gallo ug sa kapaskohan.

“Amo gyud tan-awon ang kadak-on sa mga simbahan ug mo-coordinate ta sa ilahang administrator pud sa simbahan  kung unsay ilahang gikinahanglan pud gikan namo,” ni sigon ni Police Lieutenant Colonel Janette Rafter, Deputy City Director for Operations sa CCPO.

Dili pa kahatag ang CCPO bahin sa ilang deployment plans sa mga tawo diha sa mga simbahan ug ubang lugar apan nagpasalamat sila tungod kay gipadad-an sila sa Regional Mobile Force Company (RMFB)-7 og dugang 60 ka polis.

Gi-request kini sa kapulisan alang sa dugang seguridad sa mga kalihukan nga mahitabo sa siyudad sa Sugbo kada adlaw.

“Mas maayo gyud naa tay augmentation so that our personnel from the station can also function o their normal routines like administrative and also to provide operational accomplishment sa atong unit and other law enforcement activities,” ni Rafter pa.

Dili sab mawagtang ang Police Assistance Desks(PADS) nga ipang montar sa mga simbahan nga pwede duolan sa mga tawo nga dunay mga problema o mga pangutana.

Kabahin lang kini sa mas gipahugtan nila nga seguridad ug gipaabot nga si CCPO Director Colonel Ireneo Dalogdog mobisita sa mga worship places ug uban pa aron masiguro ang seguridad sa publiko.

“There will be beefing up of security sa atong places of worships and as I’ve said this is not just limited to the mga ubang sect but this include all the places of worship, we have to coordinate with the other sect also para sa conduct sa ilang worship kay kahibalo ta on December it’s not only the other sect is conducting misa, naa puy mga aktibidades ang ubang sect nato sa katilingban,” sigon ni Rafter.

Mandaue City

Si Mayor Jonas Cortes miawhag sa mga bag-ong natudlong opisyales sa kabarangayan nga motabang sa pag-monitor sa ilang mga konstituwente ilabi na kadtong mga bag-ong balhin og puyo sa ilang lugar.

Kini isip kabahin sa preparasyon sa seguridad nunot sa kapaskohan.

Lapu-Lapu City

Sa Lapu-Lapu City, si City Police Director Elmer Lim mipatawag og tigum uban sa mga community leaders sa mga Muslim nga namuyo sa siyudad aron paghangyo kanila nga tabangan ang pamentinar sa kahapsay ug kalinaw sa siyudad.

Ang awhag gihimo human sa nahitabong pagpamomba didto sa Marawi City nga nga puntariya mga Kristyano samtang nasimba.

Talisay City

Samang pagpangandam sab ang gihimo sa kapolisan sa Dakbayan sa Talisay nga gimando sab ni Mayor Gerald Anthony Gullas.

Gawas sa kapolisan pinangulohan ni Police Lt. Col. Wayne Magbanua, pakigtagboan sab sa mayor ang mga kadagkoan sa Simbahan sa siyudad kabahin sa seguridad sa Misa de Gallo ug mga kalihokan sa Pasko.— Gabriel Bonjoc, IBM (BANATNEWS)