Geverola nisaad nga mga kauban sa selda ang una niyang kliyente

CEBU, Philippines — Ang 41 ka person under police custody giingong mahimong unang kliyente ni Jigger Geverola kong mahingpit na kining maabogado.

Ang maong mga PUPC nakauban karon ni Geverola diha sa custodial facility sa Cebu City Police Office.

Si Geverola apil sa 3,812 ka nipasar sa 2023 Bar Examinations nga gipahigayon niadtong buwan sa karong tuiga. Karong Disyembre 22, 2023 ang oath taking sa mga bag-ong nipasar nga mga abogado.

Giangkon ni Geverola nga kalipay ug kaguol ang iyang gibati gumikan sa iyahang sitwasyon karon.

Nalipay siya gumikan kay nakapasar siya sa bar exam ug nagbunga ang iyang mga kahago ug naguol usab kini tungod sa kasong robbery in band nga gipasaka sa kapolisan batok kaniya.

“Base sa nahitabo nako karon ang purpose gyud sa Ginoo nga pahinumduman ko sa akong gisaad nga kong makapasar ko akong gamiton sa pagpangalagad ngadto sa Ginoo ug sa nanginahanglan, una nakong kliyente ang kauban nako diri sa selda tanan ron 41 kabuok pro-bono, pero una pa na mo-sign pa gyud ta sa roll of attorney mao nang hopefully makalabang ta ani karon, December 22 man, hopefully, optimistically maka-sign ta sa roll of attorney”, padayag ni Geverola.

Nasayran nga ikaduhang higayon kini ni Geverola nga nikuha sa bar examination diin ang unang bar exam niya niadtong tuig 2021.

Kabahin sa pagpangandam ni Geverola sa pagkuha sa bar exam ang pag-enroll sa review center ug aduna siya’y mga study partners.

“Preparation, mindset, determination kong destined gyud ka para diha tuon-tuon, basa mao ra gyud”, ni Geverola pa.  Si Geverola nagkanayon nga kong makapanumpa ug makapirma siya sa roll of attorney gamiton niya ang iyahang propesyon sa pagpangalad sa katawhan sa Probinsiya sa Sugbo diin konektado siya karon sa buhatan ni Board Member Raymond Calderon.

“Sila nihatag nako og lawyer para sa kaso nako karon in the name of Atty. Vincent Isles”, butyag ni Geverola. (BANAT NEWS)