Biktima sa tulis ug gikulata satulisan dili na mopasaka og kaso

CEBU, Philippines — Dili na interesado sa pagpasaka og kaso ang usa ka 56-anyos nga babaye kinsa gitulis ug gikulata sa duha ka tulisan samtang naglakaw diha sa Barangay Lawaan 3, Dakbayan sa Talisay niadtong niaging semana.

Si Police Lieutenant Colonel Wayne Magbanua, hepe sa kapolisan sa Dakbayan sa Talisay nibutyag nga ang biktima nipadayag nga dili nalang mopadayon sa pagpasaka og kaso.

Kini bisan pa nga aduna na sila’y mga tawo nga gisundan nga maoy responsable sa hitabo.

Sayo pa, ang biktima padulong kini nga mouli sa iyang giabangan nga pinuy-anan dihang gihunongan sa duha ka lalaki nga nagsakay og motorsiklo.

Ang back rider maoy nition kaniya og kutsilyo dayon labnot sa iyang bag.

Apan ang biktima nagdumili sa pagbuhi sa iyang bag hinungdan nga nahitabo ang binunlotay hangtud nga ang naulahi gikulata sa tulisan ug giyatakan pa ang dagway niini.

Human nakuha ang bag sa biktima daling nisibat ang mga tulisan.

Ang biktima kinsa nakaangkon og samad ug bun-og sa lawas ang gidala ngadto sa tambalanan.

Apan matud ni Magbanua nga bisan og dili na interesado nga mopasaka og kaso ang biktima padayon gihapon nila nga gi-monitor sa mga tulisan. — BDB (BANATNEWS)