PRO-7 padayon ang pangandam sa holiday season

CEBU, Philippines — Padayon ang pagpangandam sa Police Regional Office (PRO)-7 sa holiday season ug sa mga mosunod nga adlaw madugangan ang kapolisan nga ipakatap diha sa kadalanan aron magbantay sa publiko.

Matud ni Police Lieutenant Colonel Gerard Ace Pelare, tigpamaba sa PRO-7 nga hingusgan sa kapolisan ang ilang operasyon batok sa mga personalidad nga nalambigit sa pagpangawat ug pagpanulis.

Isip tubag usab sa kamandoan ni Police Brigadier General Anthony Aberin, direktor sa PRO-7 nga tutokan sa kapolisan nga dili mosaka ang krimen.

“For this year we want the holidays to be peaceful and lesser crimes will be committed and ang atong estratehiya magpabilin with intensified police presence this time not only in areas of convergence but in isolated areas”, matud ni Pelare.

Matag semana ang PRO-7 mohimo og analysis sa crime trend ug diha nila gibase ang ilang deployment base sa nakita nila sa analysis.

“For example unsay mga krimen nga daghang mahitabo sa Central Visayas, asa ni sila nahitabo ug unsa orasa, naa tay weekly analysis ani, atong himuon mag-adjust ta or mag-introduce ta og mga estratehiya para dili man ma-zero mo-lesser ang mga krimen nga gihimo”, dugang ni Pelare. (BANAT NEWS)