Kapolisan mipahimangno kalabot sa pagsiaw sa peke nga kwarta

CEBU, Philippines — Gipanglantawan sa Police Regional Office (PRO)-7 nga mosiaw ang tanang klase sa crimes against property apil na ang pagpangilad gamit ang peke nga kwarta.

Nunot niini, si Police Lt. Col. Gerard Ace Pelare, tigpamaba sa Police Regional Office-7 miingon nga ang gihimo nila karon mao ang pag-maximize sa information operations.

Mohimo sila og information dissemination sa mga angayan buhaton aron magmatngon ug malikayan nga mabiktima sa mga badlungon sa katilingban.

Giawhag sa kapolisan ang publiko nga motahu gilayon sa ilang buhatan kun makabantay o magduda nga gibayran og peke nga kwarta.

Gawas niini, nagpahimangno sab ang kapolisan mahitungod niining mga kawatan nga mosulod og balay.

Siguraduhon nga naka-lock ang pultahan, bentana kun matulog ug kun molakaw sa panimalay.

Kun mahimo sab magbutang og CCTV sanglit dako kini og tabang dili lang sa pagpakgang sa krimen apan apil na sab sa pagtumbok sa mga suspek nga moresulta sa pagkasikop niini.

Samtang si Police Lt. Col. Wayne Magbanua, hepe sa kapolisan sa Dakbayan sa Talisay nitataw nga sa ilang monitoring wala pa hinuon makasulod ang peke nga kwarta sa Talisay.

Sa miaging katuigan mao gyud ning panahon nga mogara ang ilegalista sa paghimo sa ilang modus sa pagpangilad sa mga tawo.

Suma pa ni Magbanua nga sila maghimo og rekorida, manghatag og flyers sa angay nga pagabuhaton sa mga tawo nga makasugat niining mini nga kwarta. (BANAT NEWS)