Mayor Cortes, Suan nipagawas og EOs para sa Kalagkalag 2023

CEBU, Philippines —  Giluwatan  ni Mayor  Jonas  Cortes ang Executive Order Number 56, Series of 2023 nga gitumong alang sa hapsay ug malinawon nga pagbantay sa mga sementeryo nga pribado ug publiko   apil na usab niini ang mga Columbarium sa pagtimaan sa Kalag-Kalag ug Todos Los Santos sa Siyudad sa Mandaue sa Nobiyembre 1 ug 2, 2023.

Iyang giawhag ang katawhan sa pagsunod sa mga lagda nga ipatuman sa mga sementeryo sa dakbayan.

Sugod  sa Oktobre 31, 2023 hangtod sa Nobyimbre 2, 2023 abli ang mga Public ug Private Cemetery  sulod sa 24  oras.

 Aning mga adlawa sab wala unay tugotang maglubong og minatay aron dili makadugang sa kahuot sa mga tawong moduaw sa ilang mga minahal sa kinabuhi nga mitaliwan na sa laing kalibutan.  Alas 5 sa hapon sa Oktobre 31 lamang kutob ang pagpanglimpiyo, pag-ayo sa mga naguba sa panteyon, pagpamintura o ang pagtaud og mga suga.

Ang Traffic   Enforcement  Agency of Mandaue gitahasan sa paghapsay sa dagan sa trapiko sa kadalanan apil na sa mga designated vehicle and motorcycle parking areas.

Samtang bantayan sa Mandaue City Public Market Office ang mga vendors nga adto ra gyud sila maninda sa gitaganang lugar aron dili makapuno sa traffic.

Ipatuman sab ang liquor ban, gidili ang pagpanigarilyo, pagdala og mahait nga hinagiban, sugal, ug lanog nga sound system sa mga sam-ang.

Adunay Police Assistance Desk nga ipahimutang sa Mandaue City Police Office sa mga sam-ang samtang dunay magpatrolyang mga polis sa sulod.

Sa pikas bahin, mga naninda sa gawas nga bahin sa mga sam-ang sa Dakbayan sa Talisay  ilabi na sa St. Joseph Cemetery sa Barangay Tangke ug sa Cansojong Public Cemetery nihangop nga gitugotan silang makapanindad bisan sa liwas sa kalagkalag o Nobiyembre 3.

                Nalipay sila nga nibalik og kusog ang ilang panindang buwak ug kandila. Giangkon hinuon nila nga nisaka gyud ang presyo karon, nidoble pa gani, kay ang kaniadto P50 nga pungpong sa buwak karon tag P100 na.

Ang mga kandila duna gihapoy tag P2, P3, ug P5 samtang kadtong gisud og baso nagkantidad P30 ngadto sa P150 depende sa gidak-on.

Sa lungsod sa Cordova, ipatuman ang one entrance, one exit policy sa mga sam-ang niini subay sa executive order ni Mayor Cesar "Didoy" Suan.

Sa maong EO mag sugod pag abli ang mga sam-ang alas 6 sa buntag hangtod sa alas 10 sa gabii ug gidili ang pag overnight.

Walay tindero o tindera nga tugotan sa sud sa mga sam-ang gawas sa adunay permiso sa mayor human naka-comply sa rekisitos nga gihatag sa Business Permit and Licensing Office.

Adunay ibutang Police Assistance Desk ang PNP. Ang mga pribadong kompaniya giawhag nva mopatuman og susamang guidelines nga ipatuman sa LGU. ug Le Phyllis F. Antojado/IBM (BANAT NEWS)