Biktima sa bagyong Odette nakadawat og ayuda

CEBU, Philippines — Nakalukso sa kalipay ang 42-anyos  nga ginang nga taga Purok Tambis, Barangay Umapad, Siyudad sa Mandaue dihang nadawat niini ang P10,000 nga pinansiyal nga ayuda nga gihatag gikan sa National Housing Authority (NHA) alang ngadto sa mga biktima sa bagyong Odette niadtong Disyembre 16, 2021.

Ang mga biktima sa bagyong Odette sa Barangay Umapad kabahin lang kini sa mga nakadawat og ayuda gikan sa NHA.

Nangulo sa pagpanghatag sa maong cash assistance ang representate sa Emergency Housing Assistance Program sa NHA kauban ni Mayor Jonas Cortes, Bise Mayor Glenn Bercede, Konsehal Jimmy Lumapas ug uban pa.

Si Cortes nipadayag sa iyang pagpasalamat sa kadagkoan sa nasudnong kagamhanan sa paghatag sa maong pinansiyal nga ayuda ngadto sa mga biktima sa bagyong Odette.            

Sa laing bahin, nakadawat og pinansiyal  nga ayuda  gikan sa kagamhanan sa Siyudad sa Lapu-Lapu ang 14 ka pamilya nga biktima sa sunog diha sa Sitio Kitchen,  Barangay Pajo,  Siyudad sa Lapu-Lapu.

Si Mayor Junard  "Ahong" Chan maoy nangulo sa pag-apod-apod niini kauban sa pangulo sa City Social Welfare and Development Office (CSWDO) sa siyudad Junard Abalos.

Ang mga tag-iya og panimalay nga naugdaw nakadawat og P15,000 nga cash assistance, P10,000 alang niadtong partially damage ug P5,000 usab ang nadawat sa mga sharers o mga nag-abang lang og balay.

Nahitabo ang maong sunog niadtong Oktbre 6, 2023 nga gituohan sa kabomberohan nga  electrical misuse ang hinungdan.

Gibanabana sa kabomberohan sa siyudad nga niabot ngadto sa P105,000 ang danyons sa   sunog.

Si Chan nagkanayon nga ang maong mga biktima ang kasamtangan una nga gipahimutang sa evacuation center samtang nangita pasila og mga paagi sa pagpatukod sa ilang mga panimalay.

Dugang ni Chan nga gawas sa cash assistance nakadawat usab ang mga biktima ug mga galamiton sa kusina sama sa mga balde, kitchen ware ug uban pa. (BANAT NEWS)