Cebu media nasubo pagtaliwan ni Choy Torralba

CEBU, Philippines — Mitaliwan na ang usa sa mga nahibiling beteranong Cebuano broadcaster nga si Cirse Francisco “Choy” Torralba kagahapon sa edad nga 72 anyos.

Si Panky, ang ikatulo sa walo ka mga anak ni Choy mibutyag nga namatay ang ilang amahan sa sakit nga kanser sa atay.

Sumala pa sa “Cebu Journalism and Journalism,” si Choy, nagsugod sa kinabuhi sa media tungod sa iyang uyoang si Geronimo “Boy” Creer Jr. nga nagpasud kaniya sa sibyaanang dyRF aron pag host sa programang "Tug-ani'ng Lungsod" nga milanat og 30 ka tuig.

Matud pa si Creer maoy nikombinsir kang Choy niadtong 1977 nga mosud sa media human ang naulahi bag-o pang nitapos sa iyang kursong business administration sa University of Southern Philippines.

Nahimo sab siya komentarista sa usa ka programa sa sibyaanang dyLA niadtong 1981, gibalhin niya iyang programa sa panggabii sa gisirad-an ang radio dyFX. Human niini, nibalhin siya sa radio dyAR niadtong 1994 ug nibalik sa dyLA sa tuig 2005 ug nabalik kini dyRF pag 2007.

Sumala pa ni Father Felmar Castrodes Fiel, SVD, DYRF manager, 16 ka tuig nilang gikauban si Choy sa ilang sibyaanan ug dili sila makalimot kaniya nga pirmeng magpasiaw ug mangomedya.

 Daghang mga Sugbuanong tigbalita nga nakauban ni Choy ang nakurat sa pagkasayod sa balita. Usa niini si kanhi dyRF anchorman Ike Durano.

 “As I bid farewell to you with a very heavy heart, allow me to say thank you Kuya Choy for the years of friendship. For all the advice and the funny conversations and for always having my back like a real brother in all the battles and skirmishes that we've been through. May you rest in peace in God's heavenly home,” sumala pa sa posts ni Durano sa Facebook.

“Choy is a good and you can learn a lot from him as media veteran and a person. He will surely miss in media circle,” matud pa usab sa laing broadcaster nga si Edward Ligas.

Samtang si Ramil Ayuman, special assistant ni Mayor Michael Rama ug kanhi Apas barangay captain, ug kanhi usab tigbalita miingon nga ang pamilyang Torralba dili makalimtan sa mga taga Apas. “Pahuway sa dayon sir Choy Torralba. Ang pamilyang Torralba di na kalimtan sa taga- Barangay Apas,”matud niya.

Matud pang Ayuman, si kanhi Major Ramon Torralba, amahan ni Choy kinsa maoy kanhi medical director sa Central Command niadtong 1950s maoy mibunyag sa ilang lugar nga “Apas” sa dihang nabuwag na kini gikan sa Barangay Lahug.

“Tungod ang mga asawa mo-apas sa ilang sundalong bana sud sa kampo. Kini maoy hinungdan ang dan duol sa Gate 1 sa CentCom gihangalan nga Torralba Street,” matud niya.

Si Panky miingon nga ang haya sa ilang amahan anha himuon sa Sacred Heart Chapel sa Cebu City hangtud sa adlaw nga Sabado. (BANAT NEWS)