I-BOL ni Digul mobisita sa kabarangayan; libreng sine sa Poblacion Park

CEBU, Philippines — Mobisita unya sa matag barangay sa Dakbayan sa Talisay ang sakyanan nga maghatag og libreng serbisyo ingon man manghatag og kaalam alang sa mga tinun-an ug ginagmay nga tigpapatigayon.

Si Konsehal Eduardo “Digul” Gullas III, chairman sa committee on education ug entrepreneurship nihimo sa programang “I-BOL ni Digul”.

Matud ni Gullas nga ang I-BOL nagpasabot kini sa Inter-active Barangay Onsite Learning and Livelihood ug usa kini ka sakyanan nga maghatag og serbisyo pinaagi sa edukasyon, negosyo ug panginabuhian.

Ang programa magtanyag og libreng printing services, libre nga paggamit sa tulo ka computer alang sa pag-research, film showing nga mopakita og educational videos alang sa mga tinun-an ug makagamit sa materyales pagtudlo sa pagpanginabuhi ug pagpalambo sa negosyo.

Nagkanayon si Gullas nga samtang nagpadayon ang programa sa usa ka lugar makahigayon usab ang gagmay nga negosyante sa pagpakita sa ilang produkto sa katawhan tungod kay mahimo ra sila nga makabaligya.

Nag-una sa schedule mao ang Sitio Tunga, Barangay Tanke nga gihimo niadtong Huwebes ug Biyernes.

Sa sunod semana ang I-BOL ni Digul mobisita sa Barangay Dumlog sa Septiyembre 21 ug 22 gikan sa alas 4:00 sa hapon ngadto sa alas 9:00 sa gabii.

Sa laing bahin, libreng sine ang gitanyag sa kagamhanan sa Dakbayan sa Talisay ngadto sa katawhan diha sa Poblacion Park. Gisugdan kini sa adlaw’ng Biyernes sugod sa alas 4:00 sa hapon ngadto sa alas 6:00 sa gabii alang sa mga salida nga pambata ug mosunod na dayon ang mga salida alang sa mga hamtong. Si Mayor Gerald Anthony “Samsam” Gullas, Jr. nibutyag nga mas maayo nga hatagan og kahigayonan nga makauban ang minahal sa kinabuhi pinaagi sa pagtan-aw og salida.

Ang mayor nagkanayon nga bisan sa ka busy sa pagtrabaho angay lang nga hatagan usab og oras ang mga minahal sa kinabuhi. Ang libreng salida makita kini matag biyernes sa gabii.

Tipik usab kini sa mga kalihokan sa nagsingabot nga kapistahan sa patrona sa siyudad Sta. Teresa de Avila.  BDB (BANATNEWS)