Away sa mga anak niresulta sa pagpanunggab sa amahan

CEBU, Philippines — Away sa mga anak nisangpot sa pagpanunggab sa usa ka amahan ngadto sa iyang silingan niadtong Miyerkules sa gabii, Hulyo 19, didto sa Sitio Banker, Lutac, dakbayan sa Naga.

Ang biktima nga nahilandig sa hospital naila nga si Robinson Bartido,35, samtang ang suspetsado mao si Rey Durano, 25, nga parehong nagpuyo sa nahisgutang lugar.

Matud pa sa inisyal nga imbestigasyon ni Police Master Sgt. Ronald Bahian sa Naga City Police Station nga gasugod ang panaglalis niini tungod lamang sa panag-away sa ilahang mga anak. Apan giingong kalit lang gidunggab sa suspek ang biktima gamit ang kutsilyo sa may paa ug daling nisibat sakay sa motorsiklo.

Ang biktima daling gidala sa Naga Infirmary Mendiola Center ug nagplano ang pamilya nga ibalhin og laing tambalanan.

Kasamtangan nagpaabot pa karon ang kapolisan sa Naga nga mo-file og kaso ang pamilya sa biktima ngadto sa suspetsado. — CNU Intern/MEL (BANAT NEWS)