Mga nominado sa peso award giila na sa DOLE

CEBU, Philippines —  Opisyal nang giila sa Department of Labor and Employment (DOLE-7) pinaagi sa ilang website ang mga nominadong siyudad ug probinsiya  nga mosalmot sa Best Public Employment Services Office (PESO) Award nga makigtigi ngadto sa laing rehiyon sa tibuok Pilipinas.

Ang PESO award usa ka pag-ila ug pagpasidungog sa matag rehiyon alang sa paghatod sa daku ug walay puas nga serbisyo, ingon man kontribusyon ug mga nahimong programa alang sa pagpadali sa trabaho.

Ang Bohol Province nominado sa kategoryang PESO for the First Class Province, samtang ang mga munisipalidad niini sama sa Talibon, Bohol nominado sa kategoryang First Class Municipality ug ang Mabini, Bohol anaa usab sa kategorya nga 4th – 6th Class Municipality. Ang Cebu City usab nominado sa kategoryang PESO for the Highly Urbanized City, samtang ang Dumaguete City anaa ubos sa kategoryang PESO for the Component City/Independent Component City.

Si DOLE-7 Regional Director Lilia A. Estillore nitumbok nga ang mga nominadong rehiyon sa PESO gi-endorso na ngadto sa National Evaluation Committee sa DOLE Central Office. Si Estillore midugang nga ang mga contenders sa PESO Award diin sila makigkompetensya maoy mo representar sa matag rehiyon sa tibuok nasud.

“We laud all the PESOs especially the regional nominees for demonstrating commitment as an intermediary arm of the Department of Labor and Employment in delivering its programs and services to the public,” suma pa ni drector Estillore.

Ang national awarding ceremonies mahitabo sa Oktubre 25 hangtud sa 27, 2023 atol sa pagpahigayon sa 2023 National PESO Congress, nga pagadumalaon sa DOLE Regional Office No. 8 sa Tacloban City.