Gabayan para sa mountain trekking umolon   

CEBU, Philippines — Tungod sa trahedyang nahitabo sa mga kabataang nag-trekking sa Budlaan Falls, magpahimo og gabayan si Cebu City Mayor Nestor Archival Sr. para dili na mausab ang hitabo.

Niadtong Hulyo 12, 2025 dunay mga kabataang nag-trekking sa lugar apan naabtan sila og kusog nga pagbunok sa uwan samtang toa sila sa Kabang Falls o mas naila sa tawag nga Budlaan Falls.

Ang pagbunok sa uwan nipakusog sa bul-og sa tubig hinungdan nga naglisod sila sa paglabang, hangtud nga dunay usa kanila ang naanod ug nalumos.

Laing tulo ang nasalbar sa mga nirespondeng sakop sa BFP-7 Special Rescue Force nianang pagkagabii na.

Base sa pasiunang imbestigasyon sa otoridad nga gipahimangnuan na ang mga batan-on nga dili na mosungasong paingon sa Kabang Falls apan nilabang gyud kini bisan dili na maayo ang kahimtang sa panahon.

Sa pagpaingon palang nila didto nikalit og kusog uwan ug nikusog sab ang bul-og sa tubig sa sapa hinungdan nga na-stranded sila didto.

Kadtong 21 anyos nga nakalas kay nalumos dili kini makamaong molangoy. Gimando ni Archival kang Konsehal Dave Tumulak, ang labaw sa City Disaster Risk Reduction and Management Committee nga susihon kun unsa ang sitwasyon ug kun unsa ka delikado ang maong dapit ilabi na sa panahon sa ting-uwan.

Gusto ni Archival mag-umol og safety protocols para sa mga hikers ug trekkers sa bukirang barangay para sa kaluawasan sa tanan.

Mihangyo sab si Archival sa mga hikers nga maminaw kun unsay pahimangno sa mga tawo nga nasuhito na sa maong mga lugar aron malikayan ang disgrasya.

Si Konsehal Nyza “Nice” Archival kinsa maoy tsirman sa komitiba sa turismo gitahasan sa mayor paghimo niining gabayan.

Gikatakda sab nga magtagbo ang mga opisyales sa barangay ug Tumulak aron tukion ang mga angayang buhaton aron dili na masubli pa ang nahitabo sa mga batan-on. Si Budlaan Barangay Captain Nerissa Antolijao nipasidaan sa mga gustong mag trekking nga mokuha gyud og guide gikan sa ilang dapit aron dunay makagiya nila. (BANAT NEWS)