Usa ka pamilyang pushers  

CEBU, Philippines — Usa ka pamilyahan ang nadakpan sa managlahing operasyon sa kapulisan sa Sawang Calero Police Station 6 ug Mambaling Police Station 11 Cebu City Police Office(CCPO) niadtong Domingo sa gabii, Hulyo 13, 2025.

Ang unang operasyon gihimo sa pasado alas- 9 sa gabii niadtong Domingo sa Barangay Sawang Calero ning siyudad diin tulo ka indibidwal ang nadakpan.

Kini mao ang magtiayong Andrew Estaño, 45,  ug Mariette Estaño, 44, apil sa nadakpan ang ilang 24- anyos nga anak nga si Jessele Estaño, 24, pulos nagpuyo sa Block 7 sa maong barangay.

Nakuhaan ang mga suspetsado og 6.60 grams sa gituohang shabu nga nagkantidad og P44,000.

Samtang paglabay sa pila ka oras, nasikop sab sa Mambaling Police Station 11 ang laing miyembro sa ilang pamilya nga giingong usa ka tirador o hitman.

Ang suspek mao si Jettcent Estaño, 18, nagpuyo gihapon sa Block 7 sa maong barangay kinsa unang gialarma nga “armed person” ug sa pagresponde sa mga polis nakuhaan siya og 15 gramos sa gituohang shabu nga nagkantidad og P102,000 ug usa ka kalibre .45 nga armas nga dunay usa ka bala.

Consolacion

Tulo ka mga indibidwal ang nadakpan sa buy-bust operation sa Consolacion Municipal Police Station sa Purok Batong, Barangay Danglag, Lungsod sa Consolacion kagahapon sa buntag, Lunes, Hulyo 14, 2025.

Nadakpan ang subject sa buy-bust operation nga si Rhanie Mark Anthony Mahusay Yuson, 33 anyos, nagpuyo sa Cogon, Barangay Poblacion, Lungsod sa Liloan ug usa ka high value individual.

Nadakpan sab ang duha ka mga kauban niini nga sila si Joseph Go Villamor, 22 anyos, taga Barangay San Vicente, Liloan ug si Marc Christian Caballero, 27 anyos, nagpuyo sa Barangay Ermita, Siyudad sa Sugbo.

Nasakmit gikan sa mga suspetsado ang 400 grams nga shabu nga nagkantidad og P2.7 million.

Nasayran nga duha ka semana gi-monitor ang mga suspect ug nahibaw-an nga maka dispose kini og tunga sa kilo sa gituohang shabu kada semana diha sa

Consolacion, Liloan, Compostela ug Mandaue City City.

P45M drugas

Sa kinatibuk-an, ang Police Regional Office(PRO)-7 nakasakmit og P45.8 million nga balor sa illegal nga drugas sa  us aka semanang anti-illegal drug operations sa tibuok rehiyon.

Gikan sa July 6 hangtod sa 12, 2025 ubos sa liderato ni PRO-7 Regional Director Police Brigadier General Redrico Maranan ang PRO-7 nakapahigayon og mga operasyon nga miresulta sa pagkompiskar sa gibana-banang 6.7 kilos nga shabu nga nagkantidad og P45.8 million, pag-ibot sa marijuana plants nga nagkantidad og P8,332 ug pagdakop sa 288 ka drug suspects.

“These operations are not just about confiscating narcotics. Each seizure means safer communities, fewer crimes, and better protection for our families and youth," sigon ni Maranan.

Usa sa paagi pagpahugot sa kampanya kontra ilegal nga drugas mao ang paghigpit sa seguridad sa mga utlanan ug entry points.(BANAT NEWS)