Talisay City College magdugang og lima ka kurso
CEBU, Philippines — Gipahibawo ni Talisay City mayor Gerald Anthony “Samsam” Gullas nga lima ka kurso unya ang ipuno sa Talisay City College (TCC) sa sunod tuig.
Subay niini gipadayag ni Gullas nga daghan pa sila og trabahuon apan kun kining tanan magmalampuson mapahimuslan gyud kini sa mga tinun-an.
Ang mga kurso nga posibleng madugang mao ang Bachelor of Science in Tourism Management; Bachelor of Arts in Political Science; Bachelor of Science in Entrepreneurship; Bachelor of Physical Education ug Bachelor of Secondary Education major in Science.
Si Gullas niingon nga nakigtigom na siya sa TCC Board of Trustees ug lakip sa ilang gihisgutan ang pagdugang og mga kurso nga kapilian sa Talisaynon nga tinun-an.
Dugang pa sa mayor nga wala mapakyas ang TCC sa paghatag og saktong edukasyon sa mga tinun-an ubos sa liderato ni Dr. Richel Bacaltos.
Busa siya nanghinaot nga sa dugang pa nga pagpaningkamot mapun-an na gyud og kurso ang tunghaan.
Samtang sa laing bahin nagtinguha si konsehal Eduardo “Digul” Gullas III sa siyudad sa Talisay nga mahatagan og pinansyal nga insentibo ang mga Talisaynon nga board passers.
Si Gullas nga maoy chairman sa committee on Education nipapasar sa unang pagbasa sa iyang ordinansa nga ang mga board passers makadawat og tag P10mil pesos.
Kini isip ilang ganti sa ilang paningkamot sa pagtungha ug makabaton og lisensya isip mga professional.
Matud pa ni Gullas usa kini ka paagi nga ang mogradwar sa kolehiyo mopursige gyud sa ilang gikuhang propesyon.
Ang Talisay aduna nay gihimo nga cash incentive apan alang lang kini sa mga topnotchers.
Sa nasayran ilang nahatag nga incentives moabot lang sa tag P5mil pesos sa mga topnotchers.
Nagplano siya nga amendahan kini og patas-an ang ihatag ilabi na sa sa medicine ug bar topnotchers.
Nanghinaot si Gullas nga mapasar gyud ang iyang ordinansa aron sa paghatag og kadasig sa mga Talisaynon.
- Latest
