Nipakatap sa ilang sex videos gidakop

CEBU, Philippines — Nadakpan sa entrapment operation ang usa ka 33- anyos nga lalake nga giingong nanghulga sa babayeng karelasyon nga ipadala niini ngadto kahigalaan ug kaparyentihan sa naulahi ang ilang sex videos kun kini dili na makigkita kaniya pag-usab.

Ang suspek nga gidakop mao si JR Nacilla Villagracia, nagpuyo sa Pari-an sa Siyudad sa Sugbu apan lumad nga taga Guihulngan City, Probinisya sa Negros Oriental.

Ang biktima nga 38-anyos kauban ang mga sakop sa City Intelligence Unit ug Women’s and Protection Desk (WCPD) sa Cebu City Police Office misikop sa suspek diha sa lawak sa usa ka lodging house sa dalan Leon Kilat sa Barangay Kalubihan sa Cebu City niadtong Huwebes sa hapon.

Ang suspek nagpaabot unta sa biktima nga mosanong nga magkita silang duha sa maong lodging house, apan miabot man tuod ang babaye apan duna nay kaubang mga polis nga nagdala og posas.

Matud ni Police Colonel Ireneo Dalogdog, City Director sa Cebu City Police Office nga nakarelasyon sa biktimang taga Lungsod sa Consolacion.

 Ang babaye adunay bana nga seaman sud na sa 18 ka tuig, apan nakaila niini ang suspek pinaagi sa social media ug nagkarelasyon ang duha sud na sa upat ka buwan.

Matud pa, kada adlaw’ng Sabado ug Domingo magkita kanunay ang duha diha sa Cebu Metropolitan Cathedral ug kada kita sa duha giingong duna gyuy mahitabo nilang duha.

Apan kadugayan nakabantay ang babaye nga mao ra ni gikahiligan sa suspek diha kaniya ug gani mamugos na kini pirme nga sila maghilawas hinungdan nga dihay usa ka higayon niadtong bulan sa Mayo nga iyaha gyud kining gibalibaran.

Matud pa sa reklamante, nasuko ang suspek ug gipadad-an niini og kopya sa ilang sex videos ang iyang igsuon, mga higala sa Facebook, hasta sa iyang kapuyo ug mga paryente.

Apan bisan pa niini, gipasaylo ra siya sa babaye. Apan ning bag-o lang, subli matud pa namugos ang suspek nga magkita silang duha pagusab. Apan ang babaye dili na gusto tungod sa gibuhat sa suspek kaniya, apan giingong gibaharan na sab siya niini nga i-post sa Facebook ang ilang sex videos maong nakadesider ang biktima nga modangop sa kapolisan.

“Gi-post niya kay dili ko mosugot nga makigkita niya. Mao to (ning bag-o) iya ko gibaharan nga og dili ka makigkita nako ako ning i-post atong mga videos sa imong mga friends, sa akong bana nahitabo ni pagka May dayon ako siya gipasaylo unya giusab niya atong Sunday kay dili naman ko makigkita niya mao nay ipanghulga kada mobalikbad ko,” sigon sa 38- anyos nga biktima.

Gitabangan sa WCPD ug CIU ang bikitma ug niadtong Huwebes sa hapon nagkita ang biktima ug ang dinakpan sa simbahan, nanglakaw paingon sa dalan Colon kay dunay gipaayo nga cellphone human gisugo sa amo dayon nanulod sila og lodging house.

Dihang nakasulod na sila sa kwarto girumbo dayon sa kapulisan ang kwarto ug didto gidakop ang suspek.

“Gi-assist dayon ni siya sa atoang WCPD unya gialalayan pud sa atoang City Intelligence Unit ang nag-lead si Police Lt. Mondragon from CIU diha-diha dayon nag-conduct sila og entrapment operation nga nag-resulta sa pagdakop sa maong suspetsado,” sigon ni Dalogdog.

Ang dinakpan sa iyang bahin mitug-an sa mga tigbalita nga dili gyud unta siya gustong magkarelasyon silang duha kay basin mapriso  siya kay nakahibalo siyang duna kini bana, ug nakonsensiya sab siya,  apan giingong wala mosugot ang babaye.

Giangkon sa dinakpan nga kada kita nila mag-record silang duha sa paghimo nila sa lawasnong kalipay. Matud niya daghan na sila og nahimong  sex videos apan ilaha ng  gipang-delete ug upat nalang ang nabilin.

Miangkon sab siya matud pa sa pagpasa og sex video sa amiga sa biktima kay nalagot siya sa mga chat sa mga amiga ug sa manghod  nga babaye sa biktima kay gipasanginlan siyang siya maoy namugos nga makighilawas.

Matud niya iyahang gipadala nila ang sex video aron ipamatuod nga wala siya namugos sa babaye ug sinabutan nilang duha ang ilang gihimo.

“Tungod lagi na sa magsige ana ako daw sige’g pamugos, wala man ko nagsige’g pamugos maayo pa’g ipakita,” sigon ni Villagracia.

Nunot sa maong hitabo si Dalogdog nagpahinumdom sa publiko likayan ang ingon ani binuhatan kay gawas nga mamahimong kining ebidenisya batok sa nalambigit sa pagkuha sa video mapasakaan sab og kaso tungod sa Data Privacy Act.

Gikatakda nga pasakaan og kasong grave coercion in relation to Republic Act 10175 sa Anti-Cyber Crime Law ug Republic Act 9262 o Physical Abuse.  Romeo D. Marantal, IBM (BANATNEWS)