Traffic lights sa Minglanilla magamit na sa di madugay
CEBU, Philippines — Gipahibawo ni Minglanilla mayor Rajiv Enad nga pipila ka semana magamit na gyud ang traffic light sa lungsod.
Matud pa ni Enad nga sud sa unom ka buwan nga pagtrabaho sa poste ug suga mapahimuslan na gyud kini sa mga motorista.
Asoy pa niya nga nahuman na ang pagtaod sa pedestrian lights, traffic lights, controller ug overhead camera sensors sa kadalanan sa Plaza Margarita, Tungkil, Pakigne, Calajo-an, Gaisano Grand Mall, Abuno St. Tunghaan, Tungkop Road.
Dugang pa sa mayor nga gihatagan nila kini og prayoridad sa iyang administrasyon alang sa kahapsay sa kadalanan ug sa pagtuman usab sa iyang saad sa katawhan.
Si Glenn Antigua, pangu sa Minglanilla Traffic Commission (MITCOM) miingon nga ang gipaabot nalang mao ang paghuman sa pagtaod sa wiring sa VECO ug koneksyon niini padung sa Command Center.
Samtang sa laing bahin mokabat sa lima ka sakyanan ug siyam ka motorsiklo ang gisulod sa impounding area sa buhatan sa Traffic Enforcement Agency of Mandaue (TEAM) human nasuta nga dunay kalapasan atol sa Motor Stop ug Road Clearing Operation nga gipahigayon niadtong Martes Hunyo 6, 2023.
Ang hiniusang operasyon sa mga sakop sa Traffic Enforcement Agency of Mandaue (TEAM), kapolisan sa Mandaue City Police Office (MCPO) ug mga sakop sa Land Transportation Office (LTO) gihimo diha sa dalan HJ Abellana sa barangay Cubacub.
Laing operasyon ang ilang gihimo diha sa Zuelleg sa Barangay Mantuyong diin napulo ka mga driver ang giisyuhan og Citation Tickets ug siyam ka motorsiklo ang gisulod sa impounding area.— Gabriel C. Bonjoc, MEL (BANATNEWS)
- Latest
