Archdiocesan Shrine of San Roque nagsaulog sa ika-50 ka tuig

CEBU, Philippines — Gisaulog niadtong Sabado sa Archdiocesan Shrine of San Roque diha sa Mambaling ang ika-50 ka tuig niini diin giawhag ni Auxiliary Bishop Ruben Labajo ang magtutuo nga padayon gihapon sa ilang paglawig uban sa dakong pagtuo sa Ginoo.

Gipahigayon ang procession libot sa Mambaling nianang pagka kadlawon nga gitambongan sa mga debotos ug gibenditahan ang tanang mga imahe.

Alas dies sa buntag gipahigayon ang Pontifical Mass ni Bishop Labajo, uban ang kaparian sa Archdiocese of Cebu ug mismo sa kura Paruko Fr. Carmelo Diola ug Parochial Vicar Fr. Nash Yap.

Bagang duot sa magtutuo ang nitambong usab sa maong santos nga misa.

Sulod sa santos nga misa gipahigayon usab ang pag blessing sa retablo, Presidential Chairs, Crucifix, ambo ug altar table.

Matud pa ni Labajo, ang pagsaulog sa ika-50 ka tuig dili lalim tungod kay daghang kalisdanan ang naagian apan padayon gihapon nga nagpanaw ug nagmauswagon. Iyang giawhag ang mga magtutuo nga padayon sa ilang pagpalambo sa pagtuo uban sa paglawig sa ilang isig-kaingon.

Samtang si Diola sa iyang bahin mapasamalaton sa tanang mga tawo nga nipaambit ug nitabang alang sa pagpanindot sa simbahan ug sa palibot nga gisugdan niadtong panahon sa COVID-19 pandemic. — MEL (BANAT NEWS)